BBC-ის ინფორმაციით, 2018 წლის მარტში, კალიფორნიაში სამართალდამცველებმა შეუიარაღებელი შავკანიანი ბიჭი, 22 წლის სტეფონ კლარკი ცეცხლსასროლი იარაღით მოკლეს. ერთი წლის შემდეგ ცნობილი გახდა, რომ მკვლელობაში ბრალდებულ პოლიციელებს არ გაასამართლებენ.
პროკურორის განცხადებით, პოლიციელებს ჰქონდათ ვარაუდი, რომ ბიჭი შეიარაღებული იყო და მათ სიცოცხლეს საფრთხე ემუქრებოდა, რის გამოც შესაბამისად იმოქმედეს. როგორც პროკურორმა თქვა, იმ პერიოდში სამართალდამცველები შემთხვევის ადგილთან ახლოს მომხდარ ძარცვის ფაქტებს იძიებდნენ.
22 წლის ბიჭი გასული წლის მარტში საკრამენტოში ბებიის სანახავად იყო ჩასული. როგორც მოგვიანებით პოლიციელთა ვიდეოკამერისა და ვერტმფრენიდან გადაღებული კადრებიდან გაირკვა, პოლიციელებმა ბიჭს 20-ჯერ ესროლეს. საბოლოოდ კი ბიჭს არა იარაღი, არამედ მხოლოდ მობილური ტელეფონი iPhone-ი უპოვეს. ამასთან, პოლიციელებმა 5 წუთამდე დააყოვნეს სანამ დაჭრილს პირველად დახმარებას აღმოუჩენდნენ.
ბიჭის მკვლელობამ მაშინ საპროტესტო აქციები და საზოგადოების აღშფოთება გამოიწვია, ისინი პოლიციელთა მიერ შავკანიანი მოქალაქეების წინააღმდეგ ძალის გადამეტებას აპროტესტებდნენ.