BBC-ის ინფორმაციით, ლიბიის დედაქალაქ ტრიპოლისთან სამთავრობო ძალებსა და მეამბოხეებს შორის საბრძოლო მოქმედებები განახლდა. გენერალ ხალიფა ჰაფტარის მეამბოხეებსა და ტრიპოლის მთავრობის ჯარს შორის შეტაკებები, დედაქალაქის სამხრეთით ოთხ რაიონში ხდება.
ლიბიელი ამბოხებულების არმიის გენერელმა ხალიფა ჰაფტარმა თავის ჯარს, ქვეყნის დედაქალაქ ტრიპოლის შტურმის აღებით ბრძანება 5 აპრილს გასცა.
2011 წელს მუამარ კადაფის გადაყენების შემდეგ, ლიბიაში ორი მმართველობა ჩამოყალიბდა. ტრიპოლი და ქვეყნის დასავლეთ მხარე ხელისუფლების კონტროლის ქვეშაა, რომელსაც მხარს უჭერს გაერო. აღმოსავლეთ ნაწილი და სამხრეთი 2014 წელს არჩეული „ტობრუკეს“ მთავრობის კონტროლის ქვეშაა, რომელიც მხარს უჭერს ხალიფა ჰაფტარს და მის ჯარს.
„დიდი შვიდიანის“ ქვეყნებმა განაცხადეს, რომ ქვეყანაში სამხედრო აქტივობა დაუყოვნებლივ უნდა შეწყდეს. მსგავსი შინაარსის მოწოდება გაავრცელა გაერომაც.
2018 წლის შემოდგომაზე გამოცემა The Sun და რუსული РБК წერდა, რომ რუსეთმა ლიბიაში სამხედროები გადაისროლა. გამოცემები იუწყებოდნენ, რომ ლიბიაში რუსული კონტინგენტი ჰაფტარის სამხედროებს ამზადებდა. მოსკოვი ამ ბრალდებას უარყოფდა.