თბილისის მერის მოადგილის პოსტზე გიგა ნიკოლეიშვილის კანდიდატურის წარდგენას საკრებულოს სხდომაზე კამათი მოჰყვა. ოპოზიციონერმა დეპუტატებმა მის კანდიდატურასთან დაკავშირებით უარყოფითი დამოკიდებულება გამოხატეს.
ხათუნა სამნიძე დაინტერესდა, ვინ მიიღო გადაწყვეტილება შერჩეულ კანდიდატებთან დაკავშირებით.
მისივე თქმით, თბილისს არაპოპულარული მერი ჰყავს და დღეს მერიაში ქაოსი სუფევს.
ფრაქცია „ეროვნული ფორუმის“ წარმომადგენელმა, გარემოს დაცვის კომისიის თავმჯდომარე შორენა ბუხრაშვილმა კი სხდომაზე ჩამოთვალა ყველა ის პირი, რომელიც თბილისის მერიაში ბოლო პერიოდში მუშაობდა და სტრუქტურული ცვლილებების შედეგად გათავისუფლდა. იგი დაინტერესდა, თუ სად იმყოფებიან ახლა აღნიშნული პირები.
„იმხელა სია ჩამოთვალეთ, რომ ამას 2 სხდომა არ ეყოფა“, – განაცხადა შორენა ბუხრაშვილის საპასუხოდ თბილისის საკრებულოს თავმჯდომარე გიორგი ალიბეგაშვილმა.
სხდომაზე ყველა ოპოზიციური ფრაქციის წარმომადგენელმა განაცხადა, რომ წარმოდგენილ კანდიდატურებს მხარს არ უჭერენ.
თავის მხრივ, გიგა ნიკოლეიშვილმა ვერ დაასახელა, თუ რა იქნება მისი საკურატორო სფეროები. საუბრისას მან აღნიშნა, რომ დღეს შეხვდება თბილისის მერს და განისაზღვრება მისი მუშაობის სფერო.
ამ ფაქტმაც საკრებულოს ოპოზიციონერი დეპუტატების უკმაყოფილება გამოიწვია.
„მეამაყება, რომ ჩემს მეგობრებთან ერთად ქვეყნის უსაფრთხოებას ვიცავდი“, – განაცხადა გიგა ნიკოლეიშვილმა სხდომაზე ოპოზიციონერი დეპუტატების საპასუხოდ.
