ემოციურად რთულია ისაუბრო ამ ყველაფერზე, ძალიან მძიმეა სურათი, რომელიც მივიღეთ, – ამის შესახებ 20-21 ივნისს რუსთაველის გამზირზე განვითარებულ მოვლენებზე საუბრისას თბილისის მერმა კახა კალაძემ განაცხადა. როგორც კალაძემ მუნიციპალიტეტის მთავრობის სხდომაზე აღნიშნა, პასუხისმგებლობა ამ ყველაფერზე ეკისრებათ იმ უპასუხისმგებლო პოლიტიკოსებს, რომლებიც პირდაპირ მოუწოდებდნენ ახალგაზრდა გოგო-ბიჭებს პარლამენტში შევარდნაზე.
„ემოციურად მართლაც მძიმე მოვლენებს ჰქონდა ადგილი და სამწუხაროა, როდესაც კონკრეტული უპასუხისმგებლო პოლიტიკოსების მხრიდან ხდებოდა ჩვენი ახალგაზრდების გულწრფელი პროტესტის გამოყენება ძალიან ცუდი ფორმებით. ეს ძალიან სამწუხაროა. სამწუხაროა, როგორ განვითარდა მოვლენები.
ძალიან მძიმე სანახავი იყო, რა თქმა უნდა, როდესაც ჩვენ ვნახეთ ის ყველაფერი, რაც პარლამენტის სხდომათა დარბაზში მოხდა. ამას რა თქმა უნდა, მოჰყვა მყისიერი რეაგირება. პასუხისმგებლობა ეკისრება ჩვენს გუნდა ამაზე და ეს კარგად გვაქვს გააზრებული და რეაგირებაც იყო მყისიერი. პარლამენტის თავმჯდომარემ, ბატონმა ირაკლი კობახიძემ გადადგა ღირსეული ნაბიჯი და მან დატოვა თანამდებობა. თუ როგორ განვითარდა მოვლენები იმ საღამოს, ყველას ძალიან კარგად გვახსოვს და ემოციურად რთულია ისაუბრო ამ ყველაფერზე, ძალიან მძიმეა სურათი, რომელიც მივიღეთ. პასუხისმგებლობა ამ ყველაფერზე ეკისრებათ იმ უპასუხისმგებლო პოლიტიკოსების განცხადებებს, რომლებიც პირდაპირ მოუწოდებდნენ ახალგაზრდა გოგო-ბიჭებს პარლამენტში შევარდნაზე და ამის მაგალითები ჩვენ ვნახეთ, თუ როგორ მოქმედებდნენ ისინი. ძალიან ცუდია ეს ყველაფერი. რა თქმა უნდა, ამას უნდა მოყვეს სამართლებრივი რეაგირება“, – განაცხადა კალაძემ.