ოპოზიციური პარტიები პარლამენტში წარდგენილ კონსტიტუციურ ცვლილებებთან დაკავშირებით მმართველ გუნდს ერთიანი საყოველთაო-სახალხო განხილვის კომისიის შექმნას სთავაზობენ.
როგორც ცნობილია, 2020 წლის საპარლამენტო არჩევნების პროპორციული საარჩევნო სისტემით ჩატარების საკითხზე პარლამენტში წარდგენილია საკონსტიტუციო ცვლილებების ორი პროექტი, რომელთაგან ერთი უმრავლესობის მიერ არის მომზადებული, ხოლო მეორე ოპოზიციური პარტიების საინიციატივო ჯგუფმა შეიმუშავა.
“იმის გათვალისწინებით, რომ საკითხი არის იდენტური, როგორც სტრატეგიული შინაარსით, ასევე პუნქტობრივადაც, მოქნილობისა და ოპერატიულობისათვის სჯობს შეიქმნას საკონსტიტუციო ცვლილებების განხილვის ერთი კომისია და იქ შევეცადოთ განსხვავებული ხედვების დაახლოებას, თუკი ამას კანონი არ კრძალავს”, – განუცხადა “ინტერპრესნიუსს” „ახალი მემარჯვენეების“ ლიდერმა მამუკა კაციტაძემ.
უმრავლესობის პროექტით, 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდება და დაშვებული აღარ იქნება საარჩევნო ბლოკების შექმნა.
ოპოზიციის ვარიანტით კი, 2020 წლის არჩევნები პროპორციული სისტემით – 3%-იანი ბარიერისა და ბლოკების პირობებში უნდა ჩატარდეს.