არაკორექტული იქნება, რომ აქედან შევაფასო პრემიერის ქმედებები და მისი მოღვაწეობა, – ამის შესახებ საქართველოს პრეზიდენტმა სალომე ზურაბიშვილმა “ქრონიკას” პოლონეთში ოფიციალური ვიზიტს დროს განუცხადა.
“არაკორექტული იქნება, რომ აქედან შევაფასო პრემიერის ქმედებები და მისი მოღვაწეობა, რომელიც უნდა შეაფასოს ქართულმა პოლიტიკურმა ელიტამ და პოლიტიკურმა პარტიებმა. ხვალ იქნება იმის დრო, რომ კომენტარები გაკეთდეს”, – განაცხადა სალომე ზურაბიშვილმა.
პრეზიდენტის თქმით, გადადგომას არ აფასებენ. “ეს არის მისი გადაწყვეტილება. რაც ეხება ახალი პრემიერის დანიშვნას, მგონი უნდა დაველოდოთ და მე პირადად დაველოდები. საერთოდ, მე ვთვლი, რომ შიდა პოლიტიკურ მოვლენებზე პრეზიდენტები არ აკეთებენ განცხადებებს საზღვარგარეთ. ეს არის შიდა პოლიტიკური, უნდა ჩავიდე, გავიგო რა ვითარებაა და შემდგომში შეიძლება განცხადების ან შეფასების გაკეთება”, – განაცხადა სალომე ზურაბიშვილმა.
პრეზიდენტმა კომენტარი ასევე არ გააკეთა შს მინისტრის გიორგი გახარიას პრემიერად შესაძლო დანიშვნასთან დაკავშირებით.
საქართველოს პრემიერმინისტრმა მამუკა ბახტაძემ გადადგომის შესახებ განცხადება დღეს გაავრცელა.
არსებული ინფორმაციით, პრემიერის შემცვლელი ოფიციალურად ხვალ დასახელდება.
სალომე ზურაბიშვილი: არაკორექტული იქნება, რომ აქედან შევაფასო პრემიერის ქმედებები და მისი მოღვაწეობა
2019/09/02 15:05:34
ნანახია: 411 ჯერ