საქართველოს პარლამენტის ადამიანის უფლებათა კომიტეტის თავმჯდომარის, სოფო კილაძის თქმით, ხელისუფლების ინტერესი ქვეყნის დეოკუპაცია და დასავლურ სტრუქტურებში ქვეყნის სრულუფლებიანი გაწევრიანებაა. მისივე განცხადებით, მმართველი გუნდი ისეთ გადაწყვეტილებას არ მიიღებს, რაც ქვეყანას დააზარალებს.
„ჩვენ არც ერთ გადაწყვეტილებას არ მივიღებთ, რომელიც დააზიანებს ჩვენი ქვეყნის ინტერესს. ჩვენი ქვეყნის ინტერესი არის ოკუპირებული ტერიტორიების დეოკუპაცია, ჩვენი ქვეყნის ინტერესი არის დასავლურ სტრუქტურებში ჩვენი ქვეყნის სრულუფლებიანი გაწევრიანება და დასავლური ღირებულებების კიდევ უფრო მეტად შემოტანა ჩვენს ქვეყანაში. ეს არის ჩვენი მთავარი მიზანი“, – განაცხადა სოფო კილაძემ.
პარლამენტში დღეს, ფრაქცია „პატრიოტთა ალიანსი და სოციალ-დემოკრატების“ სხდომაზე, დეპუტატმა ადა მარშანიამ განაცხადა, რომ „საჭიროა დიალოგი მოსკოვთან, პირდაპირი დიალოგი აფხაზებთან და ოსებთან, რაც კრემლის გარეშე არ გამოვა“.
ცნობისათვის, პრემიერ-მინისტრობის კანდიდატმა, გიორგი გახარიამ აღნიშნულ საკითხთან დაკავშირებით, განაცხადა, რომ რუსეთთან არსებული ფორმატების ამოწურვამდე, სხვა ფორმატებზე საუბარი ნაადრევია, პირდაპირი კავშირები კი ოს და აფხაზ თანამოქალაქეებთან მაქსიმალურად უნდა გააქტიურდეს.