მინდა შევქმნა სტანდარტი, რომ პრეზიდენტები ერთმანეთს არ აკრიტიკებდნენ – ამის შესახებ საქართველოს ყოფილმა პრეზიდენტმა, გიორგი მარგველაშვილმა ტელეკომპანია „კავკასია“-ს ეთერში განაცხადა. მისი თქმით, მოქმედი პრეზიდენტის მიმართ კოლეგიალობის პრინციპის დარღვევას არ აპირებს.
„პოლიტიკურ პაექრობაში არ შევდივარ. მე სააკაშვილსაც არ ვაკრიტიკებდი. მას, როდესაც ჩამოერთვა მოქალაქეობა, ეს მოხდა მისივე შექმნილი კანონით, როცა ავტომატურად ჩამოერთვა მოქალაქეობა სხვა ქვეყნის მოქალაქოების მიღებისთანავე. მან თქვა, რომ მარგველაშვილმა ჩამომართვა მოქალაქეობაო და მე განვმარტე, რა მოხდა რეალურად“, – აღნიშნა მარგველაშვილმა.
მისივე თქმით, „ის შეეცდება არასოდეს გააკრიტიკოს სალომე ზურაბიშვილი“.
„უამრავი ადამიანია, ვინც ქალბატონ პრეზიდენტს აკრიტიკებს. იყოს ერთი ადამიანი ჩემი სახით, ვინც არ გააკრიტიკებს არც მას, არც ბატონ მიხეილს, არც ბატონ ედუარდს, არც ბატონ ზვიადს“, – აღნიშნა მარგველაშვილმა.