ბაია პატარაია აცხადებს, რომ შინაგან საქმეთა სამინისტროში სამაჯურები არ აქვთ. ამის შესახებ მათ უწყებამ მას შემდეგ აცნობა, რაც ეკა ჩხეიძის საქმეში ჩაერთნენ და მამაკაცზე, რომელიც მსახიობს ქორწინებას აიძულებდა მუქარითა და ტერორით, სამაჯურის გაკეთება მოითხოვეს.
„დღეს ეკა ჩხეიძე იყო ჩვენთან მოსული, ჩავერთეთ მის საქმეში, რომელიც პირწმინდად გადაკიდებაა და რატომღაც ქორწინების იძულების მუხლით მიდის. არადა 5 წელია ადამიანი ადევნებული ჰყავს და ბოლო დროს აგრესიულ მუქარებსა და ტერორზე გადავიდა.
ბევრი ვიფიქრეთ თუ ცოტა ვიფიქრეთ, მოვიფიქრეთ, რომ თუ სამაჯურს გაუკეთებდნენ მოძალადეს, ეკა უფრო მშვიდად იგრძნობდა თავს.
ამ ჩვენი შესანიშნავი იდეით მივმართეთ შსს-ს, მაგრამ სადაა სამაჯური? ჯერ არც საკანონმდებლო ცვლილებაა შესული და არც ფიზიკურად არ გვაქვსო. Nika Melia, თუ ძმა ხარ, გვათხოვე ეგ შენი სამაჯური, ტყუილად რომ აცდენ, თურმე ერთადერთია მთელ ქვეყანაში და ისიც შენ შეგაბეს, ალბათ სპეციალურად შენთვის დაამზადებინეს ამ გასაოცარ დემოკრატიულ სახელმწიფოში.
პ.ს. სამაჯურების გარკვევის თემას ბოლომდე მივყვები, აქამდე, ვინაიდან საკანონმდებლო ცვლილებები ნანახი მქონდა, მეგონა, ძალაშიც იყო და რახანც მელიას შეაბეს, ვფიქრობდი, მოძალადეებისთვისაც გამოვიყენებდით, მაგრამ ნურას უკაცრავად!
სერიიდან: ბიძინას ბოსტნის ამბები,“ – წერს ბაია პატარაია.