პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით საუბარი, თითქოს “ქართულმა ოცნებამ“ ვიღაც მოატყუა, არის ტყუილი.
მისივე თქმით, ის რომ თითქოს მთელი საზოგადოება პროპორციულ საარჩევნო სისტემაზე გადასვლას ითხოვს ფაქტის დამახინჯებაა.
“საუბარი იმაზე, რომ “ქართული ოცნება“ ჩვენს საზოგადოებას ატყუებს, არის მტკნარი სიცრუე. ეს არის სწორედ “ნაციონალური მოძრაობის“, მათი სატელიტი პარტიებისა და მათი პარტიული ტელევიზიების დღის წესრიგი. “ქართული ოცნება“ არ ატყუებს არც საკუთარ ამომრჩეველს და არც საზოგადოებას. თუკი ვინმე ატყუებდა ხალხს, ეს იყო და არის დღემდე “ნაციონალური მოძრაობა“ თავისი სატელიტი პარტიებით.
მიუხედავად იმისა, რომ იყო საუბრები, მოწოდება და თხოვნა, მათ შორის პარტიის თავმჯდომარისგან, რომ ჩვენ მხარი დაგვეჭირა პროპორციულ საარჩევნო სისტემაზე გადასვლისთვის, მოგეხსენებათ, რომ იყო “ნაციონალური მოძრაობის“ უტიფარი განცხადებებით იყო გაღიზიანება და ამანაც შეუწყო ხელი, რაც შემდგომ მაჟორიტარების მხრიდან მხარის არდაჭერაში გამოიხატა. ახლა იმაზე საუბარი, რომ “ქართულმა ოცნებამ“ ვიღაც მოატყუა, ეს არის ტყუილი. მაქარაშვილი იქნება თუ ვინმე სხვა, ის საზოგადოების ერთი ნაწილია, რომელსაც უფლება აქვს, ვინმე მოსწონდეს ან არ მოსწონდეს. თუმცა, იარლიყის მიწებება, თურმე ის არის მთელი საზოგადოება და საზოგადოება ითხოვს პროპორციულ საარჩევნო სისტემაზე გადასვლას, ეს ფაქტის დამახინჯებაა. ჩვენ პროექტის ინიცირება მოვახდინეთ, ვაწარმოეთ კამპანია საყოველთაო სახალხო განხილვებით, ასევე გვქონდა შეჯერებული პოზიცია გუნდის იმ წევრებთან მიმართებაში, ვინც მხარი დაუჭირა პროპორციულ სისტემაზე გადასვლას. ის, რომ ჩვენ არადემოკრატიული ფორმით რაიმე წარვმართეთ, ამას ვერავინ იტყვის“, – განმარტა ოხანაშვილმა.