პარლამენტის თავმჯდომარე არჩილ თალაკვაძემ საკადრო გადაადგილებასთან დაკავშირებით პარლამენტის ბიუროს დღევანდელ სხდომაზე განცხადება გააკეთა.
თალაკვაძის თქმით, პოლიტიკური კონსულტაციები საკადრო გადაადგილებებზე დასრულდა და მიღებულია შემდეგი საკადრო გადაწყვეტილებები:
„პირველი ვიცე-სპიკერის თანამდებობას დაიკავებს გიორგი ვოლსკი, ვიცე-სპიკერის პოზიციას – მამუკა მდინარაძე, რომელიც, ასევე, ჩვენი პოლიტიკური გადაწყვეტილებით უხელმძღვანელებს უმრავლესობას. ვიცე-სპიკერის პოზიციაზე წარვადგენთ გიორგი კახიანს, რომელიც აქამდე საპროცედურო საკითხთა კომიტეტს ხელმძღვანელობდა, კიდევ ერთ ვიცე-სპიკერად წარვადგენთ კახა კუჭავას. რაც შეეხება კომიტეტებს, საგარეო საქმეთა კომიტეტის თავმჯდომარის თანამდებობაზე წარვადგენთ ირაკლი ბერაიას, რომელიც აქამდე თავდაცვისა და უშიშროების კომიტეტის პირველი მოადგილე გახლდათ, ევროინტეგრაციის კომიტეტის თავმჯდომარედ წარვადგენთ დავით სონღულაშვილს, გარემოს დაცვის კომიტეტის თავმჯდომარედ წარვადგენთ ნინო წილოსანს. რაც შეეხება განათლების, მეცნიერებისა და კულტურის კომიტეტს, პირველი მოადგილის თანამდებობიდან კომიტეტის თავმჯდომარის პოზიციაზე დაწინაურდება გენადი მარგველაშვილი. საპროცედურო საკითხთა კომიტეტის თავმჯდომარე იქნება გურამ მაჭარაშვილი“ ,- განაცხადა არჩილ თალაკვაძემ.