„ქართული ოცნების“ აღმასრულებელი მდივანი ირაკლი კობახიძე და პარტიის გენერალურ მდივანი კახა კალაძე სტრასბურგში სამუშაო ვიზიტით დღეს დილით გაემგზავრნენ.
ვიზიტის ფარგლებში „ქართული ოცნების“ ლიდერები ევროპარლამენტში მოკავშირე პარტიის წევრებს, ასევე „ევროპის სახალხო პარტიის“ წარმომადგენლებსაც შეხვდებიან. აუდიენცია ევროპარლამენტარებთან 12-13 თებერვალს არის დაგეგმილი.
როგორც კალაძემ ჟურნალისტებს განუცხადა, ევროპარლამენტში გამართავენ შეხვედრებს და იმსჯელებენ იმ რეფორმებზე, რომელიც საქართველოში ხორციელდება.
„სტრასბურგში ვიზიტისას შევხვდებით ევროპარლამენტის სხვადასხვა პარტიის წარმომადგენლებს და მივაწვდით ინფორმაციას საქართველოში არსებულ პოლიტიკურ პროცესებთან დაკავშირებით და ვიმსჯელებთ ზოგადად მომავალზე, იმ რეფორმებზე, რომლებიც ხორციელდება ქვეყანაში“, – განაცხადა კახა კალაძემ.