საერთაშორისო ურთიერთობების ექსპერტის, კურტ ვოლკერის განცხადებით, საქართველოში არსებული პოლიტიკური პოლარიზაცია დიალოგის გზით უნდა აღმოიფხვრას. მისივე თქმით, ქვეყანაში წინასაარჩევნოდ დაძაბულობის აღმოფხვრა ორივე დაპირისპირებული მხარის ინტერესში შედის.
„საქართველოს წინ საარჩევნო წელი ელის, ტემპერატურა მატულობს, ადამიანები უფრო და უფრო ცდილობენ თავიანთი პოზიციების წარმოჩენას, მატულობს დაძაბულობაც. საქართველოს ბევრი მისწრაფება აქვს, იქნება ეს ძლიერი დემოკრატია, ძლიერი ეკონომიკა, მეტი სამუშაო ადგილი, ევროინტეგრაცია და რუსეთის აგრესიისგან დაცვა.
როგორც მთავრობაში, ისე ოპოზიციაში კარგი ადამიანები არიან. ამიტომ მნიშვნელოვანია მოიძებნოს გზა იმისთვის, რათა ამ ხალხმა ერთად მუშაობა შეძლოს. ქვეყანაში არსებობს პოლარიზაციის პრობლემა. საზოგადოებამ ამ პრობლემის აღმოფხვრა უნდა შეძლოს, ვინაიდან ეს ქვეყნის ინტერესებში შედის. ვითარების გაუმჯობესებისთვის მოლაპარაკებებია საჭირო.
ამასთან ერთად, აუცილებელია არჩევნები თავისუფალ და სამართლიან პირობებში გაიმართოს. ქვეყანაში შიდა პოლიტიკური დაპირისპირებაა. საქართველომ ერთობლივი მუშაობით შიდა პოლიტიკურ და ეკონომიკურ გამოწვევებთან გამკლავება უნდა შეძლოს“, – განაცხადა კურტ ვოლკერმა.