5 აპრილს, ტელეკომპანია „მთავარის“ პროგრამა PostFactum-ში გასულ სიუჟეტს – „გენები კორონა ვირუსის წინააღმდეგ,” სადაც საუბარი იყო გენური კოდების მნიშვნელობასა და ეთნიკურ უპირატესობებზე, საქართველოს ჟურნალისტური ეთიკის ქარტია სპეციალური განცხადებით ეხმიანება.
ქარტიის განცხადებით, სიუჟეტის შემდგომ წამყვანმა, გიორგი გაბუნიამ, არმენოფობიური განცხადება გააკეთა.
ქარტია მიიჩნევს, რომ მსგავსი მედია პროდუქტი ხელს უწობს ეთნიკური ნიშნით დისკრიმინაციის წახალისებას, არის რასისტული ხასიათის და ქსენოფობიური.
„ჟურნალისტური ეთიკის ქარტია აცხადებს, რომ გავრცელებული მასალა არის რასისტული ხასიათის, ქსენოფობიური და ახალისებს ეთნიკური ნიშნით დისკრიმინაციას. ეთიკის ქარტიამ არაერთხელ მოუწოდა ჟურნალისტებს, რომ განსაკუთრებული სიფრთხილით მოეკიდონ covid 19-თან დაკავშირებული ინფორმაციის გაშუქებას და მხოლოდ ზუსტი და გადამოწმებული ინფორმაცია მიაწოდონ მაყურებელს. გაუგებარია, რას ემსახურება PostFactum-ში მხოლოდ ვარაუდებზე დაყრდნობით დაუსაბუთებელი თეორიების გავრცელება, რომელიც ქართული გენის უპირატესობას წარმოაჩენს, რაც დამაზიანებელი შეიძლება აღმოჩნდეს მოქალქეებისთვის და ატარებს ქსენოფობიურ ნიშნებს. მიგვაჩნია, რომ მედიას აქვს სოციალური პასუხისმგებლობა არ გაამძაფროს დისკრიმინაცია, მედიასაშუალებებმა კი არ შეუწყონ ხელი არატოლერანტული, დისკრიმინაციული გარემოს ჩამოყალიბებას, სიძულვილის წახალისებას,“ – ნათქვამია ჟურნალისტური ეთიკის ქარტიის განცხადებაში.
ორგანიზაციაში აღნიშნავენ, რომ კორონავირუსის გავრცელებიდან დღემდე, ეს პირველი შემთხვევა არ არის, როდესაც ქართულ მედიაში გავრცელებული მასალები ეთნიკური ნიშნით დისკრიმინაციის საფრთხეებს აჩენს.
ქარტია კიდევ ერთხელ მოუწოდებს მედიასაშუალებებს, განსაკუთრებული სიფრთხილით გააშუქონ მიღებული ინფორმაცია და ყველა ზომა მიიღონ რასობრივი და ეთნიკური ნიშნით დისკრიმინაციის თავიდან ასაცილებლად