მინისტრის გადაწყვეტილებით, თავდაცვის ძალებში ფართომასშტაბიანი ინფრასტრუქტურული პროექტები დაიწყო. ჩვენ ასევე გვაქვს შემუშავებული რეკომენდაცია თავდაცვის მინისტრისთვის, რომ მომავალში გადავიდეთ საბაზო სისტემაზე. ეს არის ამერიკული მოდელი და იმისთვის, რომ მივუახლოვდეთ ინფრასტრუქტურულად ამ საბაზო მოდელს. ასევე დაგეგმილია დამატებითი პროექტები, რომლებიც გაწერილია ოთხი წლის განმავლობაში. ყოველწლიური ბიუჯეტი ასი მილიონია. დღეს მიმდინარე პროექტები, სამწუხაროდ, ვირუსის გავრცელებამ შეანელა, მაგრამ პროცესი მალე აქტიურ ფაზაში გადავა და ვიმედოვნებთ, რომ წლის ბოლომდე შედეგი გვექნება“ – ამის შესახებ გადაცემა „ღია ეთერში“ თავდაცვის ძალების მეთაურმა, გენერალმა ვლადიმერ ჩაჩიბაიამ განაცხადა.
მისი თქმით, სიახლეებია თავდაცვის ძალების სამხედრო მოსამსახურეების სოციალურ პაკეტშიც. განახლებულია სახელფასო სისტემა და გაუმჯობესებულია კვება.
„თუ წარსულში სპეცდანიშნულების ქვედანაყოფებს ჰქონდა განსხვავებული კვება, დღეს თავდაცვის ძალების მთლიან შემადგენლობას აქვს ანალოგიური კვებითი უზრუნველყოფა. არის განსხვავებული სადაზღვევო პაკეტი გასულ წლებთან შედარებით. ასევე მნიშვნელოვანია აღჭურვილობა, რომელიც უახლოეს მომავალში შემოვა თავდაცვის ძალებში. ეს არის სამხედრო უნიფორმები, რომლებიც თანამედროვე სტანდარტის, ამერიკულთან მიახლოვებული, უნიკალური ქსოვილისაა და აქვს უნარი, ნებისმიერ ამინდში იყოს ჰერმეტული ჯარისკაცისთვის. ასევე შემოგვაქვს მაღალი ხარისხის ახალი ბათინკები. გრძელდება სამხედროების გარკვეული კატეგორიისათვის ბინათმშენებლობა, გადაიხედა პირობები და ძალიან მნიშვნელოვანია, რომ ამ პროექტში მონაწილეობის 50%-იან ვალდებულებას საკუთარ თავზე თავდაცვის სამინისტრო იღებს.“ – განაცხადა თავდაცვის ძალების მეთაურმა.