„მე და ჩემი მეგობარი, კოლეგა, ბექა სივსივაძე, როდესაც გავრბოდით, ორი მეტრის დაშორებით პირდაპირ, მიზანმიმართულად გვესროდნენ“, – ამის შესახებ ჟურნალისტმა და მედიაჰოლდინგ „რეპორტიორის“ გენერალურმა დირექტორმა გიორგი მამაცაშვილმა, „ობიექტივის“ ეთერში განაცხადა და 2011 წლის 26 მაისის მოვლენები გაიხსენა.
გიორგი მამაცაშვილის განცხადებით, 2011 წლის 26 მაისს ადამიანებს ინდივიდუალურად და მიზანმიმართულად გაუსწორდნენ.
„ეს არ იყო ჯგუფური დარბევა. ინდივიდუალურად მისდევდნენ ადამიანებს. მაგალითად, მე და ჩემი მეგობარი და კოლეგა, ბექა სივსივაძე, როდესაც გავრბოდით, ორი მეტრის დაშორებით პირდაპირ, მიზანმიმართულად გვესროდნენ. ეს იყო ინდივიდუალურად დაგეშილი ძაღლების მიქსევა ადამიანებზე.
30-ზე მეტი დაზიანება ჰქონდა ბექას და 30-ზე მეტი დაზიანება მქონდა მე. ეს არ იყო მხოლოდ კერძო საექსპერტო ბიუროს დასკვნა. ეს იყო სამხარაულის დასკვნა, რომელიც იმხანად ჯერ კიდევ სახელმწიფოს კლანჭებში იყო მოქცეული. სამხარაულში ნაბიჯს ვერ გადადგამდნენ სააკაშვილის ხუშტურების გარეშე.
მადლობა მინდა გადავუხადო ირმა ინაშვილს, რადგან მისი წყალობით უცხოეთშიც საკმაოდ დიდი გამოხმაურება პოვა უშუალოდ ჩემსა და ბექას მიმართ განხორციელებულმა სადიზმმა“, – განაცხადა გიორგი მამაცაშვილმა.