სოფელ ატოცში რუსული საგუშაგო მიტოვებული და დაშლილია, ოკუპანტების მონიშნულ ადგილს კი მანეკენი იცავს – ამის შესახებ ინფორმაციას ანტისაოკუპაციო მოძრაობა ძალა ერთობაშია ავრცელებს.
მოძრაობის წევრები საქართველოს დამოუკიდებლობის დღეს ატოცში შემოვლითი გზით შევიდნენ, რადგან ქართველ სამართალდამცველებს ეს სოფელი უკვე დიდი ხანია ჩაკეტილი აქვთ.
მიზანი კი სოფელში, საოკუპაციო ზოლის სიახლოვეს არსებული ვითარების ნახვა და საოკუპაციო ხაზთან, 26 მაისს – საქართველოსა და უკრაინის ახალი დროშების აღმართვა იყო.
გადავწყვიტეთ, რომ დროშები გამოგვეცვალა 26 მაისს დამოუკიდებლობის აღდგენის დღეს. დაგვხვდა საინტერესო სურათი – დაშლილი რუსული საგუშაგო,რომელიც სავარაუდოდ განახლდება მალე. ყველაფერთან ერთად რუსებმა დაგვიტოვეს მანეკენი,რომელიც საგუშაგოს ამაგრებდა და ალბათ, ქართველებს აშინებს რუსეთი ამ სახით, – ამბობს მოძრაობის ლიდერი დავით ქაცარავა.