„ფაქტია, რომ ტურიზმის გარეშე პრობლემა გვაქვს, მეორე მხრივ კი, ძალიან კარგად უნდა მოვემზადოთ – სწრაფი ტესტები საზღვარზე, სასტუმროებში სამედიცინო პერსონალიც უნდა იყოს, ანუ, თუ ტურისტს რაღაცა დაემართა, უნდა იცოდეს, რომ იქვე ვიღაცას მიმართოს” – ასე აფასებს „რეზონანსთან” ჯანდაცვის სპეციალისტი ვატო სურგულაძე, პრემიერ-მინისრის გიორგი გახარიას განცხადებას, საქართველოში ტურისტების შემოსვლასთან დაკავშირებით.
გახარიას თქმით, საქართველოში შემოსული ტურისტებისთვის აუცილებელი იქნება, რომ ბოლო 72 საათში PCR ტესტი ჰქონდეთ გაკეთებული. ამ თემაზე გახარიამ პარლამენტში კითხვას უპასუხა და აღნიშნა, რომ ტურიზმის გახსნის პროტოკოლები უკვე დამუშავებულია მსოფლიო ტურიზმის ორგანიზაციასთან ერთად.
“მაგალითად, საქართველოში შემოსულ ტურისტს უნდა ჰქონდეს აქტუალური 72 საათიანი PCR ტესტი, წინააღმდეგ შემთხვევაში, ის უბრალოდ საქართველოში არ შემოვა. ევროპაში უკვე განიხილავენ “კოვიდ პასპორტის” თემას.
“ჩვენ რა თქმა უნდა, ქვეყანაშიც შევქმნით PCR ტესტების აღების შესაძლებლობას, სწრაფი PCR ტესტების, თუ ასეთი იშვიათი შემთხვევები გვექნება, როდესაც ჩამოსულ ადამიანს ასეთი ტესტი არ ექნება, მაგრამ ორგანიზებული ტურისტული ჯგუფები ქვეყანაში შემოვლენ მხოლოდ მაშინ, როცა ასეთი წესი იქნება დაცული”-თქვა გიორგი გახარიამ.
სურგულაძე ამბობს, რომ კოვიდ-19-ზე საზღვარზე კონტროლი კარგია, თუმცა, 100-იან გარანტიას არ იძლევა და ამიტომ ჯანდაცვის სისტემის უფრო მეტად მომზადებაა საჭირო.
„მე არ ვიცი საქართველოს მთავრობა ამაზე რას აპირებს, მაგრამ არსებობს, ტესტები, რომლებიც გვაჩვენებს ანტიგენს და ანტისხეულს – ანტიგენი ნიშნავს იმას, რომ აქტიური ფორმაა, ანუ იმ მომენტში დაავადებულია, ანტისხეული უკვე გადატანილია, მაგრამ აქ არსებობს ე.წ. ფანჯარა, როდესაც შესაძლოა არც ანტიგენი და არც ანტისხეული არ ჩანდეს.
„რაც შეეხება ე.წ. ოქროს სტანდარტს, ანუ პროტეინ ჯაჭვური მეთოდის პისიარის გამყენებას (თან ამისი სიზუსტეც 80-85-%-ია), იქ ასე სწრაფად პასუხი ვერ იქნება -სწრაფად რომ ყოფილიყო, ადამიანებს 24 საათს რატომ ალოდინებდნენ? იმიტომ, რომ საზღვარზე უნდა დააყენონ ლაბორატორია და იქ უნდა აიღონ ნაცხი და ამას საკმაოდ დიდი დრო დასჭირდება და დისკომფორტი შეიქმნება.
„ასევე, ჯანმოს კოვიდ პასპორტების შემოღება უნდა, აქაც ცოტა რთული სიტუაციაა, მაგალითად პასპორტი ავიღე, ჩამირტყეს, რომ ინფექცია არ მაქვს, მაგრამ ხომ შეიძლება, რომ ეს პერიოდი სანამ ჩამოვალ, ინფექცია ან გზაში დამემართოს, ან მეორე დღეს აღმომაჩნდეს.
“ამიტომ, სიმართლე გითხრათ, კოვიდ-პასპორტების იდეა, რომ მაგალითად კორონავირუსი გადატანილი აქვს, ეს კიდევ შეიძლება, მაგრამ ტურისტი შეიძლება გამოვიდეს, ვიღაცას შეხვდეს და დაემართოს, მაგრამ რეალურად ქაღალდი ექნება ხელზე რომ არ აქვს.
„ჩემი აზრით, მსოფლიო ჯერ ვერ ჩამოყალიბდა ეს კოვიდ-პასპორტი როგორი უნდა იყოს, გასაგებია და მე ამის მომხრე ვარ, რომ საზღვარზე ადამიანი რაღაცნაირად უნდა შემოწმდეს, მაგრამ რამდენად მოახერხებენ და ვის გადახდევინებენ ფულს – ეს არ ვიცი. ეს იაფი არ ღირს, ე.წ. სწრაფი ტესტების ფასი ბაზარზე სადღაც 15 დოლარამდეა.
„კონტროლის იდეა ცუდი არაა, მაგრამ ეს 100%-იან კი არა 50%-იან გარანტიას არ მოგვცემს, თუმცა, მე მაინც ვთვლი, რომ თუ ჩვენი ჯანდაცვის სისტემა მზად იქნება, არც ეს იქნება პრობლემა, თუმცა, თვითონაც ეჭვი ეპარებათ, რომ სისტემა მზადაა, რომ ვთქვათ კიდევ რაღაცა პატარა ტალღა რომ იყოს, რამდენად მოერევიან ამ ველაფერს, მითუმეტეს, რომ უცხოელებზე იქნება საუბარი.
„ერთი რამ არის ფაქტი, რომ ტურიზმის გარეშე პრობლემა გვაქვს, მეორე კიდევ ძალიან კარგად უნდა მოვემზადოთ – სწრაფი ტესტები საზღვარზე, სასტუმროებში სამედიცინო პერსონალიც უნდა იყოს.
“ანუ, თუ ტურისტს რაღაცა დაემართა, უნდა იცოდეს, რომ იქვე ვიღაცას მიმართოს, ასეთი სისტემაც შესაძლოა, თუმცა ძალიან რთულია ამდენი ექიმის მობილიზება და ანაზღაურება კიდევ დამატებითი ხარჯებია. ასევე, კიდევ რამდენიმე მიმართულებით უნდა გაკეთდეს კონტროლი. მომზადებაა საჭირო ყველა მიმართულებით, საზღვარი, ექიმები, პოლიცია, ანუ ყველა უნდა ვიყოთ მაქსიმალურად მზად” – განაცხადა მან.
მისივე თქმით, ამჯერად რა ეპიდემიოლოგიურ ფაზაშია საქართველო არავინ არ იცის , რადგან შესაბამისი კვლევები არ ტარდება.
„ეს არავინ არ იცის და ვინც გეტყვით, რომ იცის ეპიდემიის რა ფაზაში ვართ, მგონია, რომ ეს სიმართლეს არ შეესაბამება. ჩვენთან მასობრივი კვლევები არ ხდება – ამიტომ საქართველოზე რეალური სურათი არავინ არ იცის, პიკზე ვართ, პლატოზე ვართ, თუ რა, არავინ არ იცის.
„ხომ ვნახეთ სომხეთში რა მოხდა, ჩამოვიდა ქვევით და უცებ ერთ დღეში ხუთასზე მეტი ადამიანი მოემატა, მე არ გამოვრიცხავ, რომ აქაც ასე იყოს – მთავარია სისტემა მზად იყოს, ექიმები და ექთნები მომზადებულები უნდა იყვნენ, არა მხოლოდ ცხელების ცენტრები, არამედ მზად ყველა კლინიკა უნდა იყოს.
“ეს პერიოდი მაქსიმალურად უნდა გამოვიყენოთ ტრენინგების, პირადი დაცვის საშუალებების უზრუნველყოფით – რა თქმა უნდა მესაზღვრეები და მებაჟეებიც უნდა იყვნენ საკმაოდ მომზადებული.
„ტესტები ერთ-ერთი გზაა, 100%-იან გარანტიას არაფერი არ მოგვცემს, მაგრამ ბევრი მიმართულებით თუ ამას გავაკეთებთ, ვფიქრობ, რომ სეზონი გახსნა შესაძლოა, მაგრამ აქაც გააჩნია რომელი ქვეყნისთვის, მაგალითად რუსეთში საშინელი ეპიდემიოლოგიური მდგომარეობაა” – განაცხადა სურგულაძემ.