დღეიდან საქართველოში საქალაქთაშორისო ტრანსპორტი მუშაობას განაახლებს. გადაადგილებას შეძლებენ საქალაქთაშორისო მიკროავტობუსები და ავტობუსები. დასაშვები ხდება საქალაქთაშორისო მგზავრთა გადაყვანა კონკრეტულად მეორე და მესამე კატეგორიების ავტოსატრანსპორტო საშუალებებით.
საქალაქთაშორისო ტრანსპორტში მოქალაქეები ვალდებულნი იქნებიან, ეკეთოთ პირბადე და დაიცვან აუცილებელი ნორმები.
„რეკომენდაციები, რომლებიც ეხება როგორც სატრანსპორტო კომპანიებს, ასევე მგზავრებს, მდგომარეობს იმაში, რომ მძღოლმაც და მგზავრმაც ტრანსპორტირების დროს აუცილებლად უნდა ატაროს ნიღაბი. კომპანიები ვალდებულები არიან, უზრუნველყონ ბარიერების დაცვა მძღოლსა და მგზავრს შორის. ეს არ შეეხება მიკროავტობუსებს, მხოლოდ ავტობუსებზე გავრცელდება. რა თქმა უნდა, რეკომენდაციების დიდი ნაწილი ეხება ასევე სატრანსპორტო საშუალებების დეზინფექციას. მგზავრობის დროს კომპანიები ვალდებულები არიან, მუდმივად განხორციელდეს სალონის განიავება და ასევე, მგზავრობის დროს მიკროავტობუსების შემთხვევაში არ მოხდეს მგზავრების ფეხზე დგომა“, – განაცხადა ეკონომიკის სამინისტროს ტრანსპორტისა და ლოგისტიკის განვითარების პოლიტიკის დეპარტამენტის უფროსმა, ქეთი სალუქვაძემ საქართველოს პირველ არხთან საუბრისას.
რაც შეეხება სარკინიგზო მიმოსვლას, მგზავრთა გადაყვანა სავარაუდოდ 15 ივნისიდან აღდგება.
საქართველოში ყველა სახის საქალაქთაშორისო ტრანსპორტით, მათ შორის მატარებლით გადაადგილება 24 მარტიდან შეიზღუდა.