თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, კორონავირუსის 8 ახალი შემთხვევიდან ყველას დაინფიცირების წყარო ცნობილია.
„მათი ჯანმრთელობის მდგომარეობის შესახებ ვერ გეტყვით იმიტომ, რომ არც ერთი ჩვენს ცენტრში არ მოთავსებულა“, – აღნიშნა ეზუგბაიამ დღეს გამართულ ბრიფინგზე.
„ჩვენ ისევ ძველი პაციენტები გვყავს, ამ ეტაპზე ჩვენს ცენტრს ყავს 40 დადასტურებული შემთხვევა, მათი მდგომარეობა უცვლელია. კვლავ გვყავს ერთი მძიმე პნევმონიით პაციენტი, რომლის მდგომარეობა საბედნიეროდ სტაბილურია. უკვე მეორე დღეა პროგრესირება აღარ შეიმჩნევა და ალბათ, მალე გამოჯანმრთელების პროცესი დაიწყება. დანარჩენი შემთხვევები საშუალო და მსუბუქი სიმძიმისაა”, – განაცხადა მარინა ეზუგბაიამ.
მარინა ეზუგბაიას განცხადებით, საქართველოში კორონავირუსით ინფიცირებულების ზომიერი, კონტროლირებადი მატება შემთხვევითი არ არის და ის დაავადებათა კონტროლის ცენტრის კარგი მუშაობის შედეგია.
„ჩვენი ქვეყნის დაავადებათა კონტროლი არის საუკეთესო სამსახური, რომელმაც დღემდე მოიყვანა ქვეყანა ისე, რომ ზომიერი, კონტროლირებადია დაავადებების მატება და ეს შემთხვევითი არ არის, ეს არის ამ სამსახურის განსაკუთრებული მუშაობის შედეგი“, – განაცხადა მარინა ეზუგბაიამ.
მარინა ეზუგბაიამ განმარტა, რა შემთხვევაშია კორონავირუსით ინფიცირებული ვირუსის გამავრცელებელი.
„ვირუსის გამავრცელებელი არის ყველა პაციენტი. ეს იქნება უსიმპტომო მატარებელი, თუ პაციენტი, რომელსაც მინიმალური სიმპტომატიკა ქვს გამოხატული. განსხვავებული სიმძლავრით ხდება დაავადების გავრცელება, ყველაზე მაღალი ხარისხით გავრცელება ხდება კლინიკური ნიშნების გამოვლენიდან მეოთხე დღის პერიოდში.
დაავადების ინფიცირებიდან ბოლომდე პაციენტები არიან გადამდები. მაგრამ, ზოგადად, ყველაზე მაღალი გადადების პერიოდი, პიკი არის ინფიცირებიდან სადღაც ერთი კვირის თავზე, მე-7-8 დღეს და შემდეგ მცირდება, მაგრამ ეს მონაცემები მუდმივად იცვლება, არ არის მყარი.
ამ ექვსი თვის განმავლობაში, რაც ჩინეთში დაფიქსირდა პირველი შემთხვევა, ბევრჯერ შეიცვალა მონაცემები. ამ ეტაპზე შემიძლია გითხრათ, რომ გავრცელების ყველაზე მაღალი ხარისხი არის დაავადების გამოვლენიდან მე-7, მე-8 დღეს. მას შემდეგ თითქოს უნდა შემცირდეს, მაგრამ ალბათ ეს მონაცემები ცვალებადი იქნება“, – განაცხადა მარინა ეზუგბაიამ.