განაჩენი, რომელიც გამოიტანა უზენაესმა სასამართლომ, უნდა აღსრულებულიყო, ბრალდებულმა უნდა მოიხადოს სასჯელი, – ამის შესახებ საქართველოს პირველ არხთან საუბრისას გუდაურში დაღუპული 12 წლის სალომე ტატიშვილის დედამ, ნინო ჟვანიამ განაცხადა.
როგორც ნინო ჟვანიამ განმარტა, გიორგი ლიპარტელიანი ქვეყნის უზენაესმა ინსტანციამ დამნაშავედ ცნო და განაჩენის აღსრულებას ოჯახი დიდი ხნის განმავლობაში ელოდებოდა.
„უზენაესმა სასამართლომ ძალაში დატოვა სააპელაციოს გადაწყვეტილება. ეს მოხდა შარშან. წელიწადზე მეტი გავიდა ეს ადამიანი არ იმყოფებოდა საქართველოში და არ ესწრებოდა პროცესებს მეორე ინსტანციაში. შესაბამისად, მასზე ძებნა გამოცხადდა. დღეს ჟურნალისტებისგან გავიგე ექსტრადირებაზე ინფორმაცია. განაჩენი, რომელიც გამოტანილი იყო უზენაესი სასამართლოს მიერ, უნდა აღსრულებულიყო და მან სასჯელი უნდა მოიხადოს, შემდეგ გააგრძელოს ცხოვრება. ის, რაც ეწერა თბილისის საქალაქო სასამართლოს მოსამართლე ბესიკ ბუგიანიშვილის გადაწყვეტილებაში, არის სამარცხვინო. მოსამართლე ქვეყნის სახელით ასეთი აბსურდის დაწერას არ უნდა ბედავდეს. ჩემი პასუხია მეორე და მესამე ინსტანციის გადაწყვეტილებები. უზენაესმა სასამართლომ ამ საქმეს წერტილი დაუსვა“, – განაცხადა ნინო ჟვანიამ.
საქართველოს გენერალური პროკურატურის შუამდგომლობით, ჩეხეთის რესპუბლიკიდან გაუფრთხილებლობით სიცოცხლის მოსპობისთვის ძებნილის, გიორგი ლიპარტელიანის ექსტრადირება განხორციელდა.