საქართველოს შეიარაღებული ძალები დღეს ქართული სამხედრო ავიაციის დღეს აღნიშნავს. 24-ე წლისთავისადმი მიძღვნილი საზეიმო ღონისძიება ალექსეევკის შერეული საავიაციო ესკადრილიის სამხედრო აეროდრომზე გაიმართა.
ავიაციისა და საჰაერო თავდაცვის სარდლობის პირად შემადგენლობას სამხედრო ავიაციის იუბილე საქართველოს თავდაცვის მინისტრმა ლევან იზორიამ, ავიაციისა და საჰაერო თავდაცვის სარდალმა, პოლკოვნიკმა დავით აბრამიშვილმა და მიწვეულმა სტუმრებმა მიულოცეს.
„ვულოცავ პირად შემადგენლობას დღევანდელ დღეს. განსაკუთრებით გულისწუხილი გამოვხატე იმის გამო, რომ ძალიან ბევრი დანაკარგი აქვს ამ დანაყოფს ტერიტორიული მთლიანობისთვის ბრძოლის დროს. ისინი გამოირჩევიან ძალიან დიდი პროფესიონალიზმით. მათ გავაცანით ჩვენი გეგმები. ჩვენ ვგეგმავთ ძალიან ამბიციური გეგმის განხორციელებას, რომელიც უკავშირდება საჰაერო თავდაცვითი სისტემის ჩამოყალიბებას საქართველოში და ამ თვალსაზრისით ინტენსიურად ვთანამშრომლობთ ფრანგულ მხარესთან. ახლო მომავალში იგეგმება ექსპერტის ჩამოყვანა საფრანგეთიდან, რათა მომავალი წლის სამოქმედო გეგმა გაიწეროს. ეს დანაყოფი იქნება სწორედ ის დანაყოფი, რომელიც ამ ამბიციურ გეგმას განახორციელებს ჩვენს პარტნიორებთან ერთად ახლო მომავალში“, – განაცხადა ჟურნალისტებთან საუბრისას ლევან იზორიამ.
საზეიმო ცერემონია საქართველოს სახელმწიფო ჰიმნით გაიხსნა. ღონისძიებაზე მიწვეულმა სტუმრებმა წუთიერი დუმილით პატივი მიაგეს საბრძოლო მოქმედებებსა და საერთაშორისო მისიებში დაღუპული სამხედრო მოსამსახურეების ხსოვნას.
საქართველოს თავდაცვის მინისტრმა და საჰაერო თავდაცვის სარდალმა გვირგვინით შეამკეს საქართველოს ტერიტორიული მთლიანობისთვის დაღუპულ სამხედრო მოსამსახურეთა მემორიალი.
ღონისძიების დასრულების შემდეგ ალექსეევკის შერეული საავიაციო ესკადრილიის სამხედრო აეროდრომზე მიწვეული სტუმრებისთვის საავიაციო და საჰაერო თავდაცვის საშუალებების გამოფენაც მოეწყო.