გიორგი შაქარაშვილის ბიძის, დაზარალებულის ადვიოკატის განცხადებით, ოჯახი თვლის რომ გიორგი შაქარაშვილის მკვლელობა გახსნილია. ამის შესახებ განცხადება მირიან ნიკოლაძემ სპეციალურად გამართულ ბრიფინგზე ისაუბრა.
“ოჯახი თვლის, რომ გიორგის განზრახ მკვლელობის ფაქტი გახსნილია, რომ დანაშაულის ჩამდენი პირები მიცემულები არიან სწორად, მართებულად და სამართლებრივად გამართულად სისხლის სამართლის პასუხისგებაში, სისხლის სამართლის კოდექსის 109-ე მუხლის მეორე ნაწილით. კონკრეტულად საუბარია “ტოიოტა ქამრის” 5 მგზავრზე, ჩვენ რამდენჯერმე დავაფიქსირეთ ჩვენი მოსაზრება, მძროლთან დაკავშირებით და არ ვიცოდით ზუსტად რა პოზიცია ჩამოყალიბდებოდა, ვგულისხმობ დროს და განვლილ ქრონომეტრაჟს, ამიტომ საბოლოო ჯამში დადგინდა, რომ ხუთმა პირმა ჩაიდინა გიორგის განზრახ მკვლელობა.
დღეს არსებული მტკიცებულებებით, რაც ჩვენთვის, ოჯახისთვის არის ცნობილი, ვფიქრობთ რომ სრულად არის დადასტურებული მათ მიერ ჩადენილი ქმედება, ასევე ვფიქრობთ, რომ სასამართლოში აღნიშნულ სისხლის სამართლის საქმეს არ უნდა ჰქონდეს რაიმე სამართლებრივი პრობლემა, ვინაიდან ის მაღალი სტანდარტი, რომელიც კანონმდებლობით არის გათვალისწინებული, უკვე დაკმაყოფილებულია.
სასამართლო-სამედიცინო ექსპერტიზის დასკვნის გარდა, რომელიც გახდა ერთ-ერთი საფუძველი, აღნიშნული პირების ბრალის წარდგინების, ჩვენი და გამოძიების მიერ, განხორციელდა არაერთი მოქმედება და საბოლოო ჯამში, ეჭვშეუვალად დადგინდა, სხვა მანქნნები და სხვა პირები, გარეშე ადამიანები, გარდა “ტოიოტას” მგზავრებისა, შემთხვევის ადგილას არ იყვნენ ფიზიკურად და სხვა ვერავინ განახორციელებდა ამ დანაშაულს,”-განაცხადა სპეციალურ ბრიფინგზე გიორგი შაქარაშვილის ბიძამ, ადვოკატმა მირიან ნიკოლაძემ.
გიორგი შაქარაშვილის საქმეზე, დღეს “ტოიოტა ქამრის” მგზავრებს, ვახტანგ ჩიქოვანს, არჩილ გაგნიძეს, ნიკოლოზ რევაზიშვილს და 2 არასრულწლოვანს ბრალი განზრახ მკვლელობის მუხლით ბრალი დაუმძიმდა.