საარჩევნო ბლოკი ”პაატა ბურჭულაძე – სახელმწიფო ხალხისათვის” ხონის რაიონული ორგანიზაციის 15-მა წევრმა დატოვა. ისინი ”ქართულ ოცნებასთან” გაერთიანებას გეგმავენ.
ამის შესახებ ხონის ახალგაზრდული ფრთის ყოფილმა წარმომადგენელმა, გიორგი წოწონავამ განაცხადა. აღნიშნულის მიზეზად წოწონავამ ბურჭულაძის პარტიის ”ნაციონალურ მოძრაობასთან” თანამშრომლობა დაასახელა.
”ბურჭულაძის პარტიაში ყველანი ”ნაციონალები” არიან. ბურჭულაძის პარტია იგივე ”ნაციონალური მოძრაობაა”, უბრალოდ, სახელი აქვს სხვა”, – აღნიშნა გიორგი წოწონავამ.
”სახელმწიფო ხალხისათვის” კიდევ ერთი ყოფილი წევრის, პარტიის ხონის კოორდინატორების ყოფილი უფროსი, ზური ჩხეიძეც პარტიის დატოვების მიზეზად ”ნაციონალურ მოძრაობასთან” თანამშრომლობას ასახელებს.
”პაატა ბურჭულაძეს პატივს ვცემდი, როგორც ქართველ კაცს, მან კი ისევ ”ნაციონალებთან” დაგვსვა”, – აღნიშნა ზური ჩხეიძემ, რომელიც ასევე ”ქართულ ოცნებასთან” თანამშრომლობას გეგმავს.