ოთხი წლის წინ, თბილისში 24 წლის მოცეკვავე რუსკა ახალბედაშვილი გაუჩინარდა. დედა ლალი ქანიაშვილი, საეჭვო ვითარებაში გაუჩინარებულ ქალიშვილს ამ დრომდე ეძებს და იმედი აქვს, რომ მას იპოვის.
მოცეკვავე გოგონას დედა ახლა პატარა შვილიშვილს ზრდის, რომელიც მისი დაკარგული შვილის ვაჟია.
ლალი ქანიაშვილმა საკუთარი ქალიშვილის გაუჩინარების ისტორია „პრაიმტაიმს“ უამბო.
– ქალბატონო ლალი, რა ვითარებაში გაუჩინარდა თქვენი ქალიშვილი?
– ჩემი შვილი 2016 წლის 7 მაისს გავიდა სახლიდან. ვიცოდი სადაც მიდიოდა, მისი შეყვარებული მეორე დღეს ამერიკაში მიდიოდა და მის გასაცილებლად იკრიბებოდნენ მეგობრები. დილით კასპელმა დაქალმა მოაკითხა, რუსკა სახლიდან საღამოს გავიდა, მაგრამ რაზე ისაუბრეს არ ვიცი.
თემქაზე მეხუთე სამშობიაროს მიმდებარე ტერიტორიაზე იყო სტუმრად წასული, ბავშვი მე დამიტოვა, სტუმრად მივდიოდით ჩვენც, სადაც პატარაც უნდა წაგვეყვანა.
– როდის და ვისგან შეიტყვეთ, თქვენი შვილის დაკარგვის ამბავი?
– მეორე დღეს 8 მაისს, სადღაც ოთხი საათისთვის დამირეკა ყოფილმა სიძემ და მითხრა, მეორე განყოფილებიდან დამირეკეს, სადაც რუსკას ნივთები მიიტანესო. პოლიციაში იყო რუსკას ჩანთა და ფეხსაცმელი. როგორც თქვეს, მტკვართან ტროტუარზე იპოვეს ჩემი შვილის პირადი ნივთები.
მის შეყვარებულსაც დაურეკეს და გამოკითხეს. საღამოს კი ის ამერიკაში გაფრინდა, გამომძიებელმა მითხრა, მე დაკავების მოტივი არ მქონდაო.
რა ჩვენება მისცა იმ ბიჭმა არ ვიცი, ვინ წამაკითხებდა დაკითხვის ოქმს? ერთი ის ვიცი, რომ იმ ოჯახში სადაც გაცილება მოუწყვეს მას, კონფლიქტი არ ყოფილა. სამი წლის წინ გავხსენი რუსკას ნივთები და შელახულია, ფეხსაცმელი კი დაგლეჯილი.
– ეჭვი გაქვთ მის შეყვარებულზე?
– ამაზე პასუხი აქვს იმას, ვინც იმ დროს მათთან ერთად იმყოფებოდა.
– ვინ იმყოფებოდა კიდევ მათთან ერთად მანქანაში?
– შეყვარებული და მისი ორი ძმაკაცი. მათგან ერთ-ერთს ვიცნობ, ჩემს ოჯახშიც არის ნამყოფი. ის ძალიან დაბნეული ჩანს. მისი თქმით, მანქანაში შეკამათება მოხდა და ამიტომ გადავიდა რუსკა ავტომობილიდან.
მე ჩემი მოთხოვნები წავუყენე გამოძიებას და მინდა, დამიკმაყოფილონ. ერთ-ერთმა მოწმემ ჩემთან ოჯახში თქვა, რუსკა, როცა მოვა, იტყვის მე ცუდი ადამიანი არ ვარო და მას შემდეგ გაწყვიტა ყველამ ჩემთან კომუნიკაცია.
– არ გჯერათ იმის, რომ თქვენი ქალიშვილი მტკვარში გადახტა?
– გამოვრიცხავ იმიტომ, რომ მტკვარი დააშრეს და იქ რუსკას ნივთებიც კი არ აღმოჩნდა. ბოლოს ვინც ნახა ჩემი შვილი, მისი ვარაუდით ი გაყვანილია ქვეყნიდან და მისი ნივთები მტკვართან, შეგნებულად დააწყვეს, სხვა რამეზე რომ გადაგვეტანა ყურადღება.
დეტალური ამონაწერიდან ჩანს, რომ რუსკამ ბოლოს 112-ში დარეკა, მაგრამ რა უთხრა არ ვიცი. ტელეფონი გაქრა, არ დევს საქმეში.
როცა რუსკა დაიკარგა, ჩვენ ჩავედით მტკვართან, წყალში ჩავიდნენ ზვიად დვალიშვილი და ლუკა ღარიბაშვილი, მოვიდნენ მაშველებიც და ერთ-ერთმა თქვა, ტელეფონი ჩანთაზე იდოო. ჩემი შვილის ერთადერთი ნაკლი ის იყო, რომ უბრალოდ ლამაზი იყო.
– სად ცეკვავდა თქვენი ქალიშვილი?
– მაგაზე არაფერს ვიტყვი, იმიტომ რომ მე უკვე გიორგი მყავს. იმედი მაქვს გამოჩნდება ჩემი შვილი.
– მე არ ვერეოდი მათ ურთიერთობაში, მის შეყვარებულს ვიცნობდი როგორც გაწონასწრებულ და კარგ პიროვნებას.
– რას ეტყვით თქვენს ქალიშვილს, თუ ცოცხალია?
– ოღონდ ცოცხალი იყოს და როგორც უნდა ისე იყოს.