„ჩვენი ინფორმაციით, სააკაშვილი თურქეთიდან პროვოკაციების მოწყობას გეგმავს“, –აცხადებს „პატრიოტთა ალიანსის“ კრწანისის მაჟორიტარი დეპუტატობის კანდიდატი მერაბ ჭიქაშვილი.
მაჟორიტარობის კანდიდატმა აღნიშნული ინფორმაცია „მარშალპრესის“ პრეს–კლუბში გამართულ ბრიფინგზე „ნაციოანალური მოძრაობის“ მხრიდან დაგეგმილ პროვოკაციებზე საუბრისას გააჟღერა:
„ყველას კარგად ახსოვს, „ნაციონალური მოძრაობა“ როგორ უპირისპირდებოდა მშვიდობიან მოსახლეობას. „ნაციონალებისა“ და მიხეილ სააკაშვილის თავში ყველა იდეა, ზიზღითა და ბოღმით არის განპირობებული. მიხეილ სააკაშვილი პირდაპირ მიუთითებდა ხალხს, რომ საკუთარი ქვეყანა და ხალხი ფეხებზე ჰკიდია. სააკაშვილმა საქართველოს მოქალაქეობაზე უარი თქვა, მიიღო სხვა ქვეყნის მოქალაქეობა და გახდა სხვა ქვეყნის ოლქის გუბერნატორი. კარგად გვახსოვს, წინა არჩევნებზე სარფში მოცუცქდა სადაც ჩაის მიირთმევდა და თავისიანებს იქიდან მოუწოდებდა. ახლაც იგივეს აპირებს. ჩვენ გვაქვს ამის შესახებ ინფორმაცია, რაზეც მე და ირმა ინაშვილმა პრესკონფერენცია გავმართეთ. ეს ინფორმაცია, არ გვაქვს მხოლოდ შიგნიდან, ჩვენ 9 წლის განმავლობაში მიშა სააკაშვილის მარტო აქ არ ვებრძოდით. პირადად მე დავით თარხან–მოურავთან და ირმა ინაშვილთან ერთად გერმანიაში, ბრიუსელში, სტრასბურგში, საფრანგეთში – ყველგან. ვინმეს რომ არ გაუჩნდეს კითხვა თუ რატომ გადავიდა დავით თარხან–მოურავი აჭარის უზენაესი საბჭოს სიაში, გეტყვით, რომ ჩვენი ინფორმაციით მიხეილ სააკაშვილი აჭარის მხარედან გეგმავს პროვოკაციების მოწყობას. იქიდან უნდა პროვოცირების მოაწყობა. ჩვენ ამის უფლებას არ მივცემთ და იმედი მაქვს, რომ ხელისუფლება გარკვეულ ზომებს მიიღებს“, – აცხადებს ჭიქაშვილი.
„მარშალპრესი“