ზურაბ ნონიკაშვილი, რომელიც 2007 წელს კომუნიკაციების მარეგულირებელი კომისიის წევრი იყო, აცხადებს, რომ „ტელეიმედისთვის“ ლიცენზიის შეწყვეტის გადაწყვეტილება კანონის შესაბამისი არ იყო და ფსიქოლოგიური ზეწოლის შედეგად იყო მიღებული.
ნონიკაშვილი „ტელეიმედის“ დახურვის საქმეზე სასამართლოში მოწმის სტატუსით დაიკითხა.
ნონიკაშვილმა პროცესზე განაცხადა, რომ 7 ნოემბერს დაურეკეს შსს-ს ტექნიკური დეპარტამენტიდან და უთხრეს, ე.წ. მოდულის შენობაში მისულიყო.
„შევედი ამირან მესხელის კაბინეტში. იქ დამხვდა რამდენიმე პიროვნება, ვიცანი ვანო მერაბიშვილი და ზურაბ ადეიშვილი. სულ ორი წუთი ვიყავი. ადეიშვილმა დამავალა, წავსულიყავი სამსახურში, მოვიდოდა მურთაზ ზოდელავა და უნდა გვემუშავა ტელევიზიებთან, კონკრეტულად „იმედთან“ დაკავშირებით“,-აღნიშნა ნონიკაშვილმა.
მისივე განცხადებით, სამსახურში მისვლისას მივიდა მურთაზ ზოდელავა და წარადგინა მეხსიერების ბარათი, სადაც ჩაწერილი იყო პროექტი „ტელეიმედის“ მაუწყებლობის შეჩერებაზე.
ნონიკაშვილის თქმით, მაუწყებლობის შეწყვეტაზე არანაირი იურიდიული საფუძველი არ არსებობდა.
„ზოდელავა ოთახიდან რამდენჯერმე გავიდა, ტელეფონზე საუბრობდა. გარკვეული პერიოდის შემდეგ შენობაში დავინახე კონტრდაზვერვის სამსახურის თანამშრომლები, რომლებიც მასაც დაყვებოდნენ გადაადგილებისას. „ტელეიმედში“ შეჭრის შემდეგ ზოდელავას ვუთხარით, რომ ლიცენზიის შეჩერების საჭიროება აღარ არსებობდა, თუმცა მიუხედავად ამისა საბოლოოდ, ფსიქოლოგიური ზეწოლის შედეგად მივიღეთ გადაწყვეტილება, „ტელეიმედის“ გაფრთხილების, დაჯარიმებისა და შემდეგ ლიცენზიის საკითხთან დაკავშირებით“,-აღნიშნა ნონიკაშვილმა.
„ტელეიმედის“ საქმესთან ერთად გაერთიანებულია 7 ნოემბრის აქციის დრბევის და ბადრი პატარკაციშვილის ქონების ჩამორთმევის საქმეებიც. პროკურატურა მიხეილ სააკაშვილს, ზურაბ ადეიშვილს, ვანო მერაბიშვილს, დავით კეზერაშვილსა და გიგი უგულავას უფლებამოსილების გადამეტებაში ედავება.