სამწუხაროდ, დიდია მოტივაცია ოპოზიციურად განწყობილ ფსევდოექსპერტებში, რომ შექმნან ხელოვნური აჟიოტაჟი, რათა კონკრეტული ზიანი მიაყენონ ქართულ ეკონომიკას, იმედი მაქვს, საზოგადოებაც სიფრთხილით შეხედავს ასეთ პირთა დახატულ აპოკალიპტურ სურათებს, – ამის შესახებ საქართველოს საქართველოს ჯანდაცვის მინისტრმა, მიხეილ სარჯველაძემ მთავრობის სხდომის შემდეგ გამართულ ბრიფინგზე ჟურნალისტებს ეკონომიკურ მაჩვენებლებზე დასმულ კითხვაზე პასუხად განუცხადა.
სარჯველაძის თქმით, ხშირად პოლიტიკური მოტივაციით ნაკვები ვითომ ფსევდოექსპერტული განცხადებები გამიზნულად აზიანებს ეკონომიკას.
„ჩემთვის საკმაოდ ემოციურია ხოლმე ასეთ საკითხებზე მსჯელობა. ზუსტად გამახსენდა, მათ შორის ის ინტერვიუ და კომენტარი, რომელზეც ისაუბრა პრემიერ-მინისტრმა. კონკრეტულად რიცხვიც კი დასახელდა. მახსოვს, ადამიანი სრულიად ჩამოყალიბებული სახით, ოპოზიციურად განწყობილი ადამიანი, ცდილობდა სრულიად მტკნარი სიცრუე შეეთავაზებინა საზოგადოებისთვის, როგორც ექსპერტული მოსაზრება, თითქოს სამ თვეში მართლაც ჩამოიშლებოდა ქართული ეკონომიკა, რომ ვითარება განვითარდებოდა ძალიან უარყოფითი, პესიმისტური სცენარით და ა.შ. სინამდვილეში, მგონი, მისთვისაც გადასარევად ცნობილი იყო, რომ ეს იყო აბსოლუტურად მოკლებული ყოველგვარ დამაჯერებლობას და საფუძველს, მაგრამ თეატრალიზებული გამოსავლები იყო ამასთან დაკავშირებით, თითქოს როგორ აპოკალიპტურად განვითარდება მოვლენები.
სამწუხაროდ, ხშირად პოლიტიკური მოტივაციით ნაკვები ასეთი ვითომ ფსევდოექსპერტული განცხადებები აბსოლუტურად გამიზნულად აზიანებს ეკონომიკას. ამ შემთხვევაში, ეს არის საბედნიეროდ წარუმატებელი მცდელობა, რომ დაზიანდეს იგივე ეკონომიკური შესაძლებლობები ჩვენი ქვეყნისა. ასეთი ტიპის განცხადებები, რომელსაც აკეთებენ, არის ერთგვარი საბოტაჟი. აქედან გამომდინარე, სრულიად გაბედულად დავარქვა ასეთ ადამიანებს ფსევდოექსპერტები ამ საკითხებთან დაკავშირებით. ფაქტია, გავიდა სამი თვე და ქვეყნის ეკონომიკა არ ჩამოშლილა. აქედან გამომდინარე, ვფიქრობ, ყველაფერი ჩვენი საზოგადოებისთვის ნათელი უნდა იყოს და ცოტა მეტი სიფრთხილით უნდა უყურებდეს, მათ შორის ჩვენი საზოგადოება ისეთი ტიპის განცხადებებს, რომელზეც დღეს პრემიერ-მინისტრმა ისაუბრა. სამწუხაროდ, დიდია მოტივაცია ოპოზიციურად განწყობილ ფსევდოექსპერტებში, რომ შექმნან ხელოვნური აჟიოტაჟი, რათა კონკრეტული ზიანი მიაყენონ ქართულ ეკონომიკას, განწყობას ქვეყნის ეკონომიკის მიმართ, მის შესაძლებლობებს და ა.შ. ეს სამწუხარო რეალობაა და დიდი იმედი მაქვს, საზოგადოებაც სიფრთხილით შეხედავს მომავალში ასეთ პირთა დახატულ აპოკალიპტურ სურათებს“, – განაცხადა მიხეილ სარჯველაძემ.
ცნობისთვის, საქართველოს პრემიერ-მინისტრმა, ირაკლი კობახიძემ მთავრობის დღევანდელ სხდომაზე განაცხადა: „სამწუხაროა, როდესაც კონკრკეტული ადამიანები სრულიად შეგნებულად ცდილობენ ქვეყანაში უარყოფითი მოლოდინების შექმნას, ნიჰილიზმის დათესვას, ეს არის დაკვეთა, რომელსაც პოლიტიკური ოპონენტები ასრულებენ, საბედნიეროდ, მათი არც პროგნოზები სრულდება და არც გეგმები ხორციელდება“.