ბევრს ჯერ კიდევ არ სჯერა, რომ კორონავირუსი არსებობს და მან უკვე მოკლა 1 200 000 ადამიანი, მათ შორის, 500-ზე მეტი ადამიანი ჩვენთან, – განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ საქართველოს პირველი არხის გადაცემაში „თავისუფალი ხედვა“.
„მეტი კომუნიკაციაა საჭირო მოსახლეობასთან, მეტი ახსნა, რომ დიახ, ის არსებობს და, რომ ეს არ არის ჩვეულებრივი გრიპი. გრიპიც სერიოზული დაავადებაა, მაგრამ ის გრიპზე უფრო რთულია“, – განაცხადა გამყრელიძემ.
მისი თქმით, პანდემია ალბათ, კიდევ ერთი წელი არ დამთავრდება.
„პირველი აცრები შეიძლება, მიმდინარე წელს დაიწყოს გერმანულ-ამერიკული ვაქცინით, რაც გამოჩნდა, თითქოს ყველაზე დიდი იმედებით და იმავე ბრიტანულ-შვედური ვაქცინით, რომელიც ალბათ, დეკემბერში გამოჩნდება, მაგრამ ეს შეზღუდული იქნება. შვიდი მილიარდი ადამიანი, ან მისი ნახევარი რომ იმუნური შექმნა, დაახლოებით, 7-8 მილიარდი ვაქცინა გჭირდება. მსოფლიოში უკვე ვაქცინების რვა მილიარდი დოზაა შეკვეთილი. ჩვენ ვართ პლატფორმაზე, სადაც საქართველომ ოთხი მილიონი დოლარი შეიტანა. დაახლოებით, 20% რომ მოვიცვათ, 17 მილიონი დოლარამდე გვჭირდება, როგორც კი მარეგულირებლების მიერ პირველი ვაქცინები დამტკიცდება“, – განაცხადა გამყრელიძემ.
როგორც ამირან გამყრელიძემ აღნიშნა, ჩვენი რეგიონისთვის ვაქცინაციის დაწყება დაახლოებით, გაზაფხულზე გახდება ხელმისაწვდომი.
„მანამდე, ისევ ამ ტიპით დაგვჭირდება ცხოვრება, ანუ, იმ პრევენციული ღონისძიებებით, პირბადით და ასე შემდეგ“, – განაცხადა ამირან გამყრელიძემ.
დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა მოსახლეობას გრიპის ვირუსზე ვაქცინაციისკენ მოუწოდა.