ბათუმის რესპუბლიკური საავადმყოფოს ექიმი კორონავირუსით გარდაიცვალა.
62 წლის მამაკაცი ცხრა დღის განმავლობაში ამავე კლინიკაში მკურნალობდა.
კლინიკაში აცხადებენ, რომ პაციენტის მდგომარეობა იმდენად სწრაფად და მოულოდნელად დამძიმდა, რომ მისი გადარჩენა ვეღარ მოხერხდა.
ბათუმის რესპუბლიკური საავადმყოფოს კლინიკური მენეჯერის, გია კიკაბიძის თქმით, პაციენტის მდგომარეობა დამაკმაყოფილებელი იყო და დღეს მისი გაწერაც კი იგეგმებოდა.
„აღენიშნებოდა ფილტვის არტერიის სტენოზიც, თუმცა თავს კარგად გრძნობდა და დღეს კლინიკიდან გაწერაც იგეგმებოდა, ანალიზებიც კარგი იყო, მაგრამ მდგომარეობა უეცრად დამძიმდა. შესაძლოა, განვითარდა თრომბოემბოლია ან ინფარქტი. ძალიან სწრაფად მოხდა ეს ყველაფერი“, – განაცხადა გია კიკაბიძემ.
ბათუმში დღეს კორონავირუსით ერთი ექთანიც გარდაიცვალა, იგი შუახევის კლინიკაში მუშაობდა.
აჭარის რეგიონში გასული დღე-ღამის განმავლობაში სულ ცხრა კოვიდინფიცირებული გარდაიცვალა.