კორონავირუსით გარდაცვლილი 19 წლის თეკლა თორდიას მამა, რატი თორდია, „ქრონიკასთან“ საუბრისას აცხადებს, რომ ვირუსის დადასტურებიდან 5 დღის განმავლობაში, მისი შვილი სახლში მკურნალობდა, მდგომარეობის დამძიმების შემდეგ კი, მათ სასწრაფო დახმარების ბრიგადა გამოიძახეს და მისი კლინიკაში გადაყვანა სურდათ, თუმცა, როგორც თავად ამბობენ, მედიკოსების ინფორმაციით, იმ ეტაპისთვის, არც ერთ კლინიკაში არ იყო თავისუფალი ადგილი.
შესაბამისად, ინფიცირებულის კოვიდსასტუმროში გადაყვანა გადაწყვიტეს.
„მდგომარეობა გაურთულდა დიაბეტის გამო, მაგრამ ის ორი დღეც დიდ რაღაცას წყვეტდა. იმ ორი დღის განმავლობაში, როცა იქ ვიყავით, თავის დროზე რომ გამონახულიყო ადგილი და გადაეყვანათ, თავისთავად, შეიძლებოდა, ასეთ მდგომარეობაში არ ყოფილიყო, თუმცა, დაზუსტებით ვერ ვიტყვი. თავიდანვე, როცა კოვიდსასტუმროში მივიყვანეთ, იქაც არასწორი იყო მიყვანა, მაგრამ, უბრალოდ, სხვა გზა არ იყო, კლინიკაში ადგილი არ იყო. ჯანდაცვაშიც ვრეკავდით და ცხელ ხაზზე, სასწრაფოშიც, მაგრამ ამბობდნენ, ადგილი არ არისო“, – აცხადებს გარდაცვლილი გოგოს მამა.
19 წლის პაციენტი გერმანულ ჰოსპიტალში გარდაიცვალა, სადაც აცხადებენ, რომ ინფიცირებულ კოვიდსასტუმროდან უმძიმეს მდგომარეობაში გადაიყვანეს. გოგონას თანმდევი დაავადება დიაბეტი ჰქონდა, რის გამოც ოჯახი მის ჰოსპიტალიზებას ინფექციის დადასტურებისთანავე ითხოვდა.