„რითეილ გრუპ ჯორჯიას”-ს დირექტორი, რეზო მაღალაშვილი ტელეკომპანია „ტვ პირველზე” გასულ, 8 დეკემბრის გადაცემა „რეაქციას” “სპექტაკლს” უწოდებს და აღნიშნავს, რომ ის და ამ სექტორის სხვა წარმომადგენლები ამ სპექტაკლში უნებლიედ მოხვდნენ.
რეზო მაღალაშვილის განმარტებით, გადაცემაში ტანსაცმლის სექტორის რითეილის წარმომადგენლები არსებულ კრიზისსა და გამოსავალზე სასაუბროდ მიიწვიეს, თუმცა, მისივე თქმით, სტუდიაში მათთან ერთად აღმოჩნდნენ პოლიტიკოსები.
მაღალაშვილის თქმით, მიუღებელია, პოლიტიკოსებთან ერთად ბიზნესის წარმომადგენლები ერთ უკმაყოფილო მხარედ წარმოაჩინო.
„TV 1-ზე დღევანდელი “რეაქცია” იყო სპექტაკლი, რომელშიც უნებლიედ მოვხვდით მე და სექტორის სხვა წარმომადგენლები. წინასწარი შეთანხმებით, იქ მოგვიწვიეს ტანსაცმლის რითეილის მოთამაშეები სექტორში კრიზისთან დაკავშირებულ პრობლემებსა და გამოსავლებზე სასაუბროდ.
სრულიად მიუღებელია, პოლიტიკოსებთან (ნებისმიერთან, განსაკუთრებით, ზოგიერთ იქ მყოფთან) ერთად ბიზნესის წარმომადგენლები ერთ უკმაყოფილო მხარედ წარმოაჩინო და მეტი სიმძიმისთვის რამდენიმე გაჭირვებული ადამიანი გამოიყენო. როგორც ჩვენი კომპანია, ისე პირადად მე ვემიჯნები ამ უმსგავსო ეთერს. ეს იყო ჩემი ბოლო გამოსვლა ტვ 1-ის ეთერში”, – წერს მაღალაშვილი სოციალურ ქსელში.