სამედიცინო ცენტრ „ვივამედში“ პაციენტის ახლობლებმა კლინიკის უსაფრთხოების თანამშრომელი დაჭრეს.
კლინიკაში აცხადებენ, რომ დაშავებულის ჯანმრთელობის მდგომარეობა მძიმეა.
დაპირისპირება პაციენტის ოჯახის წევრების მიმართ დაცვის თანამშრომლის მითითებამ გამოიწვია, რომელიც შინაგანაწესის დაცვას უკავშირდებოდა.
კლინიკის დირექტორის მოადგილის განცხადებით, დაცვის თანამშრომელს ოპერაცია უტარდება და მისი ჯანმრთელობის მდგომარეობა ძალიან მძიმედ ფასდება.
„პაციენტის პატრონებსა და ჩვენი დაცვის თანამშრომელს შორის მოხდა სიტყვიერი დაპირისპირება. სავარაუდოდ, ეს უკავშირდებოდა მითითებას, შინაგანაწესის დაცვას. სიტყვიერი დაპირისპირება გადაიზარდა ფიზიკურ დაპირისპირებაში, რის შედეგადაც ჩვენი დაცვის თანამშრომელი დაიჭრა. მყისიერად მოხდა საპატრულო პოლიციის გამოძახება და ჩაატარეს საგამოძიებო მოქმედებები. ჩვენი დაცვის თანამშრომელი ეგრევე ავიყვანეთ საოპერაციოში და ახლაც მიმდინარეობს ოპერაცია. მისი მდგომარეობა ამ ეტაპზე ფასდება, როგორც მძიმე. როგორც ჩემთვის არის ცნობილი, დამნაშავეები დაკავებულები არიან. რა საგნით იყო ჭრილობა მიყენებული, ამას გამოძიება დაადგენს, თუმცა ეს იყო ბასრი საგანი და არ ყოფილა ცეცხლსასროლი იარაღი“, – განაცხადა სულხან აბესაძემ.