თბილისის ცენტრში დღეს „ერთიანი ნაციონალური“ მოძრაობის წინასაარჩევნო კამპანიის დასკვნითი აქცია გაიმართა.
პარტიის ლიდერების თანახმად, აქციის მიზანი არჩევნებამდე სამი დღით ადრე, „ნაციონალური მოძრაობის“ წინასაარჩევნო კამპანიის შეჯამება იყო. აქცია თბილისის ცენტრში, „ვარდების მოედანზე“, სასტუმრო „რედისონის“ წინ გაიმართა.
აქციაში მონაწილეობა თბილისიდან და სხვადასხვა რეგიონიდან ჩამოსულმა „ნაციონალური მოძრაობის“ მხარდამჭერებმა მიიღეს. დღევანდელი აქციის მონაწილეთა რაოდენობა ქართულ სოციალურ მედიაში გამართული ცხარე დებატების საგანი გახდა.
Agenda.ge-მ მონაწილეთა რაოდენობა სტანდარტული მეთოდის მეშვეობით გამოიანგარიშა, რომელსაც მედიასაშუალებები იყენებენ. კერძოდ, Google Maps-ის დახმარებით გამოითვალა აქციის ტერიტორიის ფართი და სიმჭიდროვე, რაშიც ფოტოგრაფის მიერ სასტუმრო „რედისონის“ ბოლო სართულიდან გადაღებული სურათები იქნა გამოყენებული.
ხალხის ნაკლებად მჭიდრო მასა, როდესაც მონაწილეებს შორის მანძილი გაწვდილი ხელის სიგრძის ტოლია, ადამიანზე 0,9 მ2-ს საჭიროებს. უფრო მჭიდრო მასის შემთხვევაში, ადამიანზე 0,4 მ2-ია საჭირო.
ტერიტორია, სადაც აქცია გაიმართა, 4 827 მ2-ს შეადგენს. Agenda.ge-ს ფოტოებზე ნათლად ჩანს მასის სიმჭიდროვე, რომელიც „ვარდების მოედნის“ სხვადასხვა მონაკვეთზე განსხვავებულია.
გამოთვლების თანახმად, მხარდამჭერთა რაოდენობა მერყეობს ორ მონაცემს შორის:
• ნაკლებად მჭიდრო მასა, რომელიც შედგებოდა 5 363 ადამიანისგან;
• მჭიდრო მასა, რომელიც შედგებოდა დაახლოებით, 12 000 ადამიანისგან.
მას შემდეგ, რაც „ერთიანი ნაციონალური მოძრაობის“ ლიდერებმა თავიანთ მხარდამჭერებს მიმართეს, შეკრებილთა წინაშე უკრაინიდან ვიდეომიმართვით საქართველოს ყოფილი პრეზიდენტი და „ნაციონალური მოძრაობის“ დამფუძნებელი მიხეილ სააკაშვილი წარსდგა. ის თავის მხარდამჭერებს დაპირდა, რომ „ნაციონალური მოძრაობა“ საპარლმენტო არჩევნებში გაიმარჯვებს.
აქციის დასრულების შემდეგ, მისმა მონაწილეებმა რუსთაველის გამზირზე მსვლელობა მოაწყვეს, რომელიც დღის მეორე ნახევარში პარლამენტის შენობის წინ დასრულდა.