დავით ბაქრაძე, სანდრა რულოვსი და გიგი წერეთელი, შესაძლოა, მათივე პარტიის სამიზნეები აღმოჩნდნენ, – ამის შესახებ “საქართველოს განვითარების ლაბორატორიის” ხელმძღვანელმა ირაკლი გოგავამ ”პალიტრანიუსის” გადაცემა ”360 გრადუსში” განაცხადა.
გოგავა ხელისუფლებას დავით ბაქრაძის, სანდრა რულოვსისა და გიგი წერეთლის მაქსიმალური დაცვისკენ მოუწოდებს. ,,ჩემი ინფორმაციით, ”ნაციონალურმა მოძრაობამ” აგვისტოში უკრაინაში, ე.წ ”ავტომაიდანი” შეისწავლა და სცადა მისი განხორციელებაც. იქ იყვნენ მათი აქტივისტები, რომლებიც გაწვრთნეს ”ავტომაიდნის” ყოფილმა ლიდერებმა. წლების განმავლობაში ვმუშაობდი უკრაინაში, ვიყავი პრეზიდენტ იუშჩენკოს კონსულტანტი, მაქვს კარგი კავშირები უკრაინის პოლიტიკურ წრეებში და ამ ქვეყნიდან ინფორმაციის მიღება ჩემთვის პრობლემას არ წარმოადგენს.
დავით ბაქრაძე, სანდრა რულოვსი და გიგი წერეთელი შესაძლოა მათივე პარტიის სამიზნეები აღმოჩნდნენ. გიგი წერეთელი არის ეუთოს საპარლამენტო ასამბლეის ვიცე-პრეზიდენტი და მის მიმართ განხორციელებული ძალისმიერი ქმედება ეუთოს მხრიდან მტკივნეულად აღიქმება. მოვუწოდებ ხელისუფლებას, რომ ამ სამი ადამიანის უსაფრთხოება მაქსიმალურად დაიცვას, ხოლო ამ სამ ადამიანს მოვუწოდებ, დაიცვან თავი საკუთარი თანაპარტიელებისგან. ეს სცენარი დაწერილია და მისი ამოქმედება დაიწყო გუშინ, როდესაც ააფეთქეს გივი თარგამაძის ავტომობილი”, – განაცხადა ირაკლი გოგავამ.