კახა კალაძე – უახლოეს მომავალში ჩვენს მოქალაქეებს ექნებათ შესაძლებლობა, ვიზების გარეშე იმოგზაურონ ევროკავშირში

უახლოეს მომავალში ჩვენს მოქალაქეებს ექნებათ შესაძლებლობა, ვიზების გარეშე იმოგზაურონ ევროკავშირში და ეს დიდი წინგადადგმული ნაბიჯია, – ამის შესახებ „ქართული ოცნების“ საარჩევნო შტაბის ხელმძღვანელმა კახა კალაძემ ტელეკომპანია „რუსთავი 2“-ის ეთერში განაცხადა.
„მინდა გამოვეხმაურო დღეს ძალიან მნიშვნელოვან მოვლენას. როგორც მოგეხსენებათ, ევროკავშირის წევრმა ქვეყნებმა დღეს მიიღეს გადაწყვეტილება ვიზალიბერალიზაციასთან დაკავშირებით. მინდა სრულიად საქართველოს მივულოცო პოლიტიკური გადაწყვეტილება, რომ უახლოეს მომავალში ჩვენს მოქალაქეებს ექნებათ შესაძლებლობა ვიზების გარეშე იმოგზაურონ ევროპულ ქვეყნებში და ეს დიდი წინგადადგმული ნაბიჯია. ეს არის კიდევ ერთი დასტური იმისა, რომ ჩვენი ქვეყნის განვითარებას ვერავინ და ვერაფერი შეაჩერებს, რომელიც განვითარების ძალიან მნიშვნელოვან სტადიაზე იმყოფება. მთლიანად ჩვენი გუნდი ყველაფერს გააკეთებს იმისთვის, რომ ეს განვითარება იყოს შეუქცევადი“, – განაცხადა კახა კალაძემ.