დეკანოზი თადეოზი, რომლის ქადაგება სკანდალის მიზეზი გახდა, შენდობის წერილს ავრცელებს.
წერილი საპატრიარქოს საზოგადოებასთან ურთიერთობის სამსახურის “ფეისბუქის” გვერდზე გამოქვეყნდა. აქვე აღნიშნულია, რომ წერილი მოწოდებულია ჭიათურისა და საჩხერის ეპარქიის მიერ.
“მე, დეკანოზი თადეოზი სარალიძე, ვითხოვ შენდობას ჩემი მღვდელმთავრისგან იმის გამო, რომ ვიქადაგე ისეთ თემებზე, რომლებზეც არ მქონდა მისი ლოცვა-კურთხევა. მოძღვარი უფლებამოსილია, ეკლესიაში იქადაგოს მხოლოდ სახარებისა და საეკლესიო დღესასწაულების განმარტება.
ეს ქადაგება, რომელიც იყო არაკორექტული, გავიდა სოციალურ ქსელებში და დიდი შეშფოთება გამოიწვია საზოგადოებაში.
ვაღიარებ, რომ შეცდომები დაშვებული იყო ეროვნული, სოციალური და პედაგოგიური კუთხით, რისთვისაც შენდობას ვითხოვ ჩემი პატრიარქისა და მთელი საზოგადოებისგან,” – ნათქვამია განცხადებაში.