1996 წლის შეთანხმება განსაზღვრავს, რომ ორ ქვეყანას შორის გამყოფი ხაზი აუცილებად უნდა გატარდეს 1938 წლის მდგომარეობით. ამ მდგომარეობას ყველაზე კარგად განსაზღვრავს 200 000-იანი მასშტაბის რუკა. 8 წლის განმავლობაში ეს ხალხი ცდილობს, რომ ეს 200 000-იანი რუკა ჩაიხსნას ამ საკითხიდან. თავიდან მას საერთოდ არ აჩენდნენ და მეუბნებოდნენ, რომ ის არც დაბეჭდილა, – ამის შესახებ ტელეკომპანია „იმედის“ გადაცემაში „იმედის ფაქტორი“ თავდაცვის ძალების კარტოგრაფია-გეოდეზიის დეპარტამენტის უფროსმა, ნოდარ ხორბალაძემ განაცხადა.
„სულ გული მწყდება იმაზე, რომ აზერბაიჯანული მხარე ვერ იცავს ისე თავის პოზიციას, როგორც ეს ადამიანები იცავენ მათ პოზიციას. 2 წლის წინ აზერბაიჯანულ მხარესთან ერთობლივი სამუშაო პროცესი გვქონდა და შეთანხმება იყო ასეთი, რომ თითოეული მხარე ზომავს იმას, რასაც მართლზომიერად მიიჩნევს და ერთმანეთს ხელს არ უშლის. როდესაც მივედით ჩიჩხიტურთან, იქ ცხარე კამათზე გადავედით, მაგრამ დროთა განმავლობაში მათმა ხელმძღვანელმა პირდაპირ მითხრა, რომ ეს საკითხი პოლიტიკურად არის გადასაწყვეტი, მაგრამ სიმართლე ყველამ კარგად ვიცითო. როდესაც შემდეგ უბნებზე გადავედით, მათ თვითონ მოიტანეს 1936-1937 წლების რუკები. 1996 წლის შეთანხმება განსაზღვრავს, რომ ორ ქვეყანას შორის გამყოფი ხაზი აუცილებად უნდა გატარდეს 1938 წლის მდგომარეობით. ამ მდგომარეობას ყველაზე კარგად განსაზღვრავს 200 000-იანი მასშტაბის რუკა. 8 წლის განმავლობაში ეს ხალხი ცდილობს, რომ ეს 200 000-იანი რუკა ჩაიხსნას ამ საკითხიდან. თავიდან მას საერთოდ არ აჩენდნენ და მეუბნებოდნენ, რომ ის არც დაბეჭდილა. რა თქმა უნდა, აზერბაიჯანულ მხარეს ეს რუკა არ მოსწონს, მაგრამ ვერ ამბობს, რომ ის ხარვეზიანი ან დამახინჯებულია. ისინი პროფესიონალი კარტოგრაფები და გეოდეზისტები არიან, ამიტომ ასეთ სისულელეს ვერ იტყვიან“, – განაცხადა ხორბალაზემ.