ისე უნდა გავიმარჯვოთ, რომ ჩვენი ქვეყნის სტაბილური, შეუქცევადი განვითარება უზრუნველვყოთ და აღარ უნდა ვისაუბროთ წარსულზე, – ამის შესახებ საქართველოს პრემიერ-მინისტრმა გიორგი კვირიკაშვილმა ვაკეში ამომრჩევლებთან შეხვედრისას განაცხადა.
გიორგი კვირიკაშვილი გუშინ ერთ-ერთი ტელევიზიის ეთერში გასულ „ქართული ოცნების“ წევრების დებატებსაც გამოეხმაურა და აღნიშნა, რომ საზოგადოების წინაშე წარსდგა გუნდი, სადაც ბევრი გამორჩეული ადამიანი იდგა.
„გუშინ ჩვენმა საზოგადოებამ იხილა საღამოს დებატები და მე მინდა აუცილებლად ავღნიშნო, რომ ჩვენი საზოგადოების წინაშე წარსდგა თანამედროვე, სრულიად ახალი ტიპის ლიდერებისგან შემდგარი გუნდი, სადაც ბევრი გამორჩეული ადამიანი იჯდა და სადაც მხოლოდ და მხოლოდ ჩვენი ქვეყნის მომავალზე იყო საუბარი . ჩვენ შეგვიძლია პირნათლად ვთქვათ, რომ ჩვენი მთავარი ამოცანა, რომელსაც პასუხი გავეცით და მომავალშიც უნდა გავცეთ არის ის, რომ შესაძლებელია ძალიან სწრაფი პროგრესი ქვეყანაში და არც ერთი უდანაშაულო ადამიანის დაჩაგვრა”, – აღნიშნა პრემიერმა.
მისივე თქმით, აუცილებელი გაგრძელდეს ქვეყნის სტაბილური, შეუქცევადი განვითარება.
“ჩვენ რა თქმა უნდა, ეჭვი არავის შეგვაქვს ჩვენს გამარჯვებაში, მაგრამ გამარჯვებაც არის და გამარჯვებაც. ისე უნდა გავიმარჯვოთ, რომ ჩვენი ქვეყნის სტაბილური, შეუქცევადი განვითარება უზრუნველვყოთ და აღარ უნდა ვისაუბროთ წარსულზე, ჩავაბაროთ, გადავშალოთ ეს ფურცელი და სწორი ფასეულობების ირგვლივ გავაერთიანოთ ჩვენი საზოგადოება. დავასრულოთ ღვარძლი, სიძულვილი და სიყვარულის კარი გავხსნათ ჩვენი მომავალი თაობებისთვის, ჩვენი მოხუცებისთვის. დავამშვიდოთ ჩვენი ქვეყანა და დავასრულოთ თავქარიანი პოლიტიკოსების ეპოქა. დავიწყოთ სულ ახალი მომავლის პოლიტიკოსების ეპოქა”, – განაცხადა გიორგი კვირიკაშვილმა.