თავდაცვის ძალების მეთაურმა, გენერალ-მაიორმა გიორგი მათიაშვილმა ვაზიანის საწვრთნელ ბაზაზე საქართველოს თავდაცვის მზადყოფნის პროგრამის (GDRP) გახსნის ცერემონიას უხელმძღვანელა. ინფორმაციას საქართველოში აშშ-ის საელჩო ავრცელებს.
GDRP სამთვიანი წვრთნისა და მზადყოფნის პროგრამაა, რომელსაც აშშ-ის საელჩოს თავდაცვის სფეროში თანამშრომლობის სამსახური უჭერს მხარს.
პროგრამის ფარგლებში ქვედანაყოფის დონეზე ჩატარდება წვრთნები და საცეცხლე ვარჯიშები, რაც საქართველოს 22-ე ქვეით ბატალიონს საკუთარი ქვეყნის თავდაცვისა და მსოფლიოს გარშემო საერთაშორისო მისიების მხარდასაჭერად საბრძოლო ოპერაციების ჩასატარებლად მოამზადებს.
საქართველოს თავდაცვის მზადყოფნის პროგრამა ხაზს უსვამს საქართველოს თავდაცვის სამინისტროსა და აშშ-ის თავდაცვის დეპარტამენტს შორის არსებულ მტკიცე თანამშრომლობას.