“ჩვენი მოთხოვნა თუ არ იქნა შესმენილი 200 კი არა, 1000 რესტორანი იქნება ღია და მომხმარებელი ისე შევა, ვერავინ დააჯარიმებს. არავის ვაშინებ, უბრალოდ ვერ მიაგნებენ” – რესტორატორთა ასოციაციის თავმჯდომარის შოთა ბურჯანაძის ამ განცხადებას, სოციალურ ქსელში გამოეხმაურა, ექსპერტი ამირან სალუქვაძე.
“ეს ნახეთ რას ამბობს, რესტორნებს ვერ მიაგნებენ, ისე იმუშავებენო.
საბოტაჟის მცდელობისთვის კანონმდებლობაში არაფერია?
ევროპის ბევრ ქვეყანაში რესტორნები 18.00-ზე იკეტება, ზოგან ოდნავ გვიან, ზოგან დახურულია.
ნიდერლანდებში დაუმორჩილებლობის აქციაზე 150 კაცი დააკავეს. ამბობენ მეტია დაკავებული. ფაქტიურად, ვინც საბოტაჟი მოაწყო, ან დააკავეს, ან დააჯარიმეს.
ჩვენთან დაიწყო შეზღუდვების მოხსნა. ეს ასოციაცია ისევ მუქარების რეჟიმშია.
აბა გამოაქვეყნეთ 1000 რესტორნის სია, რომელთა სახელითაც იფიცებით!
რომელი რესტორნების სახელითაც აჟღერებს მუქარას, ყველა ამოიღეთ სახელმწიფოს მხარდაჭერის სიიდან.
ეს მუქარის გამო, ხოლო საბოტაჟის შემთხვევაში, გაუუქმეთ რეგისტრაცია.
საინტერესოა ვინ არიან გამოქვეყნებული 76 რესტორნის მესაკუთრეები, დირექტორები არა, მესაკუთრეები?
აბა ჰკითხეთ, რამდენი მიმტანი ჰყავთ გაფორმებული? ყველამ რატომ ვერ აიღო სახელმწიფოს დახმარება? რომელიმე მათგანი თუ მოიკითხეს ამ ხნის მანძილზე?
ძალიან კარგად იციან, რომ გარე სივრცეების გახსნას მოჰყვება შიდა ფართების ამუშავებაც, მაგრამ შეგნებულად ძაბავენ.
მხარი დაგიჭირეთ ასოციაციებს რამდენიმე ტელეეთერში, მაგრამ აგივიდათ პოლიტიკის სუნი.
რომელიმე ასოციაციის განცხადება მაჩვენეთ, რომელიც მოსახლეობას წესების დაცვისკენ მოუწოდებს.
რესტორნები, რომლებიც არ იზიარებთ ამ მუქარებს და საბოტაჟის მცდელობას, იფიქრეთ პოლიტიკისგან დამოუკიდებელი ასოციაციის შექმნაზე.
