ეკატერინე ტიკარაძე ჯანდაცვის სისტემაში არსებულ პრობლემებზე საუბრობს და ფუნდამენტურ რეფორმას აანონსებს. ჯანდაცვის მინისტრი სახელმწიფო კლინიკების გაძლიერების სტრატეგიაზე მუშაობს, რაც სისტემაში ახალი რეგულაციების დანერგვას გულისხმობს.
„გვქონდა საკმაოდ დეფიციტური სერვისები რეგიონებში. პერიფერია არ იყო შესაფერისად განვითარებული, რომ მინიმალური მომსახურება მაინც მიეღო პაციენტს. კრიტიკულ მომენტში ვახდენდით პაციენტის ტრანსპორტირებას სხვადასხვა კლინიკაში. ეს არ ეხება შორს მდებარე და მცირე ზომის კლინიკებს. ბათუმიდან და ქუთაისიდანაც ძალიან ხშირი იყო პაციენტების გადმოყვანა თბილისში, რაც რისკს უქმნიდა პაციენტების ჯანმრთელობას. ხშირად ასეთი შემთხვევები მთავრდებოდა ლეტალობით“, – აცხადებს ტიკარაძე.
მინისტრის ახალი სტრატეგიის მიხედვით, იქ, სადაც სამედიცინო ცენტრია საჭირო და არ არის – აშენდება. სადაც სერვისებია დასამატებელი – დაემატება, პროფილური გაძლიერება კერძო კლინიკებსაც დაევალებათ და ფასები გათანაბრდება. სახელმწიფო მეტ გამჭვირვალობას მოითხოვს ფასწარმოქმნასთან დაკავშირებით. სამედიცინო სექტორის ეფექტიანობის გაზრდის მიზნით ქვეყნის პოლიტიკა სახელმწიფო კლინიკების გაძლიერებაზე იღებს ორიენტირს. სახელმწიფო კლინიკები ჰოლდინგში ერთიანდება და ერთი სისტემით იმართება. სამედიცინო პერსონალის კვალიფიკაცია უნდა ამაღლდეს, რაც ანაზღაურებაზეც აისახება. პირველ ეტაპზე ხელფასი ექთნებს გაეზრდებათ. სახელმწიფო კლინიკები რჩება სტუდენტებისთვის პრაქტიკული ცოდნის მიღების მთავარ კერად. სტრატეგიაზე მუშაობა მარტში დასრულდება და მას საკანონმდებლო მხარდაჭერა დასჭირდება.
„ჩვენთვის მნიშვნელოვანია, რომ საქართველოს ნებისმიერ წერტილში ერთი და იგივე მომსახურება ხორციელდებოდეს ერთი და იგივე ტარიფით და აუცილებლად ერთი და იგივე ხარისხით“, – აცხადებს მინისტრი.
ჯანდაცვის მსოფლიო ორგანიზაცია სახელმწიფო კლინიკების გაძლიერების სტრატეგიის შემუშავებაში კონსულტაციების სახით ერთვება. რეფორმის მხარდამჭერია საერთაშორისო ფინანსური ორგანიზაციებიც. ჯანდაცვის სისტემის რეფორმის ფარგლებში ერთ-ერთ პირველი ნაბიჯი კერძო სექტორთან კომუნიკაცია იქნება. კონტრაქტორად კლინიკის არჩევისას სახელმწიფო მოცულობისა და სანდოობის მიხედვით იხელმძღვანელებს.