არასამთავრობო ორაგანიზაცია „მრავალეროვანი საქართველო“ მარნეულის 48-ე საარჩევნო უბანზე ყუთის გატაცების ფაქტს არ ადასტურებს.
როგორც ორგანიზაციის წარმომადგენელმა მედიაცენტრში გამართულ ბრიფინგზე განაცხადა, საუბნო კომისიის წევრებმა ყველაფერი გააკეთეს მასალების დასაცავად და ის მეორე სართულზე აიტანეს.
„ჩვენ არ ვადასტურებთ ყუთის გატაცების ფაქტს. საუბნო კომისიის წევრებმა ყველაფერი გააკეთეს იმისთვის, რომ დაეცვათ უბანზე არსებული მასალები. ჩვენი ინფორმაციით, იმის მერე, რაც შეიქმნა საფრთხე, მათ ეს მასალები აიტანეს მეორე სართულზე და ეცადნენ მაქსიმალურად დაეცვათ უცხო პირებისგან“, – აცხადებენ ორგანიზაციაში.
„მრავალეროვანი საქართველოს“ წარმომადგენლის ინფორმაციითვე, მათ მიაწოდეს ინფორმაცია ცესკოს და მიმართეს რეკომენდაციით, რომ გაეგზავნათ დამატებითი ძალები.
„ჩვენი ორგანიზაციის წარმომადგენლები არ ტოვებენ საარჩევნო უბანს ბოლო წუთამდე და აგრძელებენ დაკვირვებებს. აღნიშნული ფაქტის თაობაზე ჩვენ მივაწოდეთ ცესკოს ინფორმაციას და მივმართეთ რეკომენდაციით, რომ დამატებითი ძალები გაეგზავნათ, რათა იქ მყოფ ადამიანებს დახმარებოდნენ“, – აცხადებენ ორგანიზაციაში.
არასამთავრობო ორგანიზაციაში აცხადებენ, რომ დაპირისპირების მიზეზებზე განცხადებას მოგვიანებით გააკეთებენ.