საქართველოს ყოფილი პრეზიდენტი, მიხეილ სააკაშვილი ნამახვანჰესის მშენებლობის წინააღმდეგ მიმდინარე აქციის მონაწილეებს სოლიდარობას უცხადებს და ამბობს, რომ საქართველოსთვის ბუნების გადარჩენა, ადამიანის საცხოვრებელი კლიმატის გაუმჯობესება, ტურიზმის განვითარება უფრო პრიორიტეტულია. სააკაშვილის თქმით, ნამახვანჰესის მშენებლობაში ბიძინა ივანიშვილის ინტერესებია ჩადებული.
ნამახვანჰესის შესახებ მას 2012 წელს სრულიად განსხვავებული მოსაზრება ჰქონდა, რომელსაც არქივიც მოწმობს.
„სულ რაღაც ორიოდ თვეში, ჩვენ ვიწყებთ ორჯერ და მეტჯერ დიდი ჰიდროელექტროსადგურის მშენებლობას ნამახვანზე. ეს, ასევე, აძლიერებს ენგურის სიმძლავრეს და ერთად, ორივე ამ ჰესის სიმძლავრე პრაქტიკულად, გაუტოლდება იმას, რაც თავიდან იყო ენგური“ – ამბობდა მიხეილ სააკაშვილი 2012 წელს ჭუბერში, მოსახლეობის წინაშე გამოსვლისას.
ქვეყნის ენერგოდამოუკიდებლობის სასიცოცხლო მნიშვნელობაზე საუბრობდა დარიალის ხეობაში ჩასვლის შემდეგაც.
„თანამედროვე მსოფლიოში ენერგეტიკული დამოუკიდებლობა არის დამოუკიდებლობის მთავარი საფუძველი. ამის გარეშე, ჩვენ მუდმივად მგლის ხახაში გვექნება თავი ჩაყოფილი“ – ამბობდა მიხეილ სააკაშვილი.
დღეს, ქუთაისის ცენტრალურ მოედანზე, ნამახვანჰესის კასკადის მშენებლობის მოწინააღმდეგეები შეიკრიბნენ. მათ ხელისუფლებას ორკვირიანი ვადა მისცეს. თუ ამ დროში არ შეჩერდება სამუშაოები და ამის შესახებ კონკრეტული პასუხი არ იქნება ცნობილი, ქუთაისის ცენტრალური მოედნის პიკეტირებას გეგმავენ.