ხელის გადაწევა მოლაპარაკება არ არის. ორმხრივი კომპრომისია საჭირო, – ამის შესახებ პარტია „მოქალაქეების“ ლიდერმა ალეკო ელისაშვილმა აშშ-ის სენატის მიერ გუშინ გაკეთებული განცხადებების კომენტირებისას „ტვ პირველის“ ეთერში განაცხადა.
მისი თქმით, ამერიკელმა სენატორებმა საქართველოში მოლაპარაკების ორივე მხარეს მყოფ პოლიტიკოსებს კომპრომისისკენ მოუწოდეს.
„ხელისუფლებისა და ოპოზიციის შეხვედრა რადგანაც გრძელდება, რაღაც ორივე მხარემ უნდა დათმოს. ეს არის პრინციპი, რომ ხელის გადაწევა მოლაპარაკება არ არის. ორმხრივი კომპრომისია საჭირო. სხვაგვარად, იქნება ხელის გადაწევა და შეჯიბრი მკლავჭიდში, ძიუდოში. მოლაპარაკებას ცოტა სხვა ფილოსოფია აქვს, რომ ერთმა მხარემაც უნდა დათმოს და მეორემაც.
მართლაც, უხერხულია, 5 თვეა მედიაში საუბარია: „შეხვალ – არ შევალ“; „ვერ დამიჭერ – დაგიჭერ“; „დავსხდეთ მოლაპარაკების მაგიდასთან“; მესამე რაუნდი, მეოთხე რაუნდი და ასე შემდეგ. რა გავაკეთოთ?! ჩვენი პარტია პროცესებს სხვაგვარად უყურებს. „ქართული ოცნების“ ნაცვლად ჩვენ ვერ ვისაუბრებთ. ესაა, რომ მედიის ყურადღების მიღმა რჩება ის პრობლემები, რაც მოსახლეობას ყველაზე მეტად აწუხებს“, – განაცხადა ელისაშვილმა.