უკრაინელი ჟურნალისტების საგამოძიებო პროექტ „ფოკუსის“ ინტერესის სფეროში ამჯერად მიხეილ სააკაშვილის ფინანსური წყაროები მოექცა. გადაცემის წამყვანების თქმით, სააკაშვილი უკრაინული წყაროებით საქართველოში რევოლუციის დაფინანსებას გეგმავს. აი, რას ყვებიან გადაცემის ავტორები:
„უკრაინაში დაიწყო სასამართლო კიდევ ერთი პროვოკატორის, სემიონ სემენჩენკოს წინააღმდეგ. თავდაპირველად სემენჩენკო ქართული სააგენტო cyc.ge-ს ჟურნალისტად ასაღებდა თავს, ხოლო მას შემდეგ, რაც ის ქართულმა პოლიციამ დააკავა, უკრაინის რადის წევრის დიპლომატიური პასპორტი აჩვენა.
3 წლის წინ სემენჩენკო და მისი თანამზრახველები თბილისში დააკავეს. ისინი საქართველოში არჩევნებზე დაკვირვების მიზნით ჩავიდნენ, შემდეგ კი პოლიციამ სასტუმროს ნომრებში პისტოლეტები და ავტომატები იპოვა. სემენჩენკოს მიერ ჩაგდებული მისიის გასაგრძელებლად სააკაშვილს თავის ოფისში საქართველოდან ემისრების ჩამოყვანა მოუწია.
„მარტივი გადაწყვეტილებების ოფისის“ დაფინანსების სისტემა უკრაინული მოძრაობა SaveФОП-ის ლიდერმა გამოაქვეყნა. სერგეი დოროტიჩი ღიად ადანაშაულებს მიხეილ სააკაშვილს იმაში, რის წინააღმდეგაც უნდა იბრძოდეს რეფორმების საბჭოს აღმასრულებელი კომიტეტის თავმჯდომარე.
მიხეილ სააკაშვილის „მარტივი გადაწყვეტილებების ოფისს“ აფინანსებს უკრაინელი ბიზნესმენი, მილიონერი ვადიმ ერმოლაევი, რომელიც ქალაქ დნიპროს ყველაზე გავლენიანი ბიზნესმენების ხუთეულში შედის. ვადიმ ერმოლაევის ქონება 322 მილიონ დოლარს შეადგენს. კომპანიათა ჯგუფ MTI-ის ვიცეპრეზიდენტი სერგეი ბაშლაკოვი ასევე შედის უკრაინის 100 ყველაზე მდიდარი ადამიანის სიაში. მათთან ერთად სააკაშვილის გარემოცვაში ყოფნისთვის იბრძვის „უკრაინის დამსაქმებელთა ფედერაციის“ ხელმძღვანელი დიმიტრი ოლეინიკი, რომელიც ღიად ლობირებდა „უკრაინის რკინიგზის“ აწ უკვე გათავისუფლებული დირექტორის, სააკაშვილის ყოფილი მოადგილის, ვლადიმერ ჟმაკის ინტერესებს.
სააკაშვილის საფინანსო ფონდებს რეგულარულად ავსებს საინვესტიციო კომპანია Dragon Capital-ის გენდირექტორი ტომაშ ფიალა, რომელიც ასევე პარტია Голос-ს აფინანსებს.
სააკაშვილის მიერ შექმნილი ორგანიზაცია ქირაობს ოფისს უკრაინის ყველაზე ძვირადღირებულ საოფისე ცენტრში. ამასთანავე, „მარტივი გადაწყვეტილებების ოფისი“ გაფორმებულია, როგორც არაკომერციული საზოგადოებრივი ორგანიზაცია. მას ხელმძღვანელობს სემიონ კრივონოსი, რომელიც ოდესის ოლქში მიხეილ სააკაშვილთან ერთად მუშაობდა.
როგორც ჩანს, მიხეილ სააკაშვილის ოფისის გარშემო გაუთავებელმა სკანდალებმა აიძულეს მისი პარტნიორი, ყაზახი ბიზნესმენი მარგულან სეისემბაევი, იფიქროს საკუთარი პოლიტიკური იმიჯის გადარჩენაზე და საჯაროდ თქვას უარი მიხეილ სააკაშვილთან თანამშრომლობაზე.
ერთი მხრივ, სააკაშვილი ეძებს ინვესტორებს თავისი ორგანიზაციის დასაფინანსებლად და ამავე ფინანსური წყაროებით საქართველოში რევოლუციის მოწყობას ცდილობს. პარალელურად კი სააკაშვილი მოუწოდებს უცხოელ ინვესტორებს, თავი შეიკავონ უკრაინაში ინვესტიციების განხორციელებისგან, რადგან იქ მათ „გადააგდებენ“, – აცხადებენ უკრაინელი ჟურნალისტები.