ის პარტიები, რომლებიც მზადყოფნას გამოთქვამენ ხელი მოაწერონ დოკუმენტს, მათ გაუჩნდათ მომავალი, რომ პოლიტიკური პარტიები ეწოდებოდეთ, – ამის შესახებ პოლიტოლოგმა, ლევან ნიკოლეიშვილმა „ქრონიკაში“ განაცხადა.
„ოპოზიციის მხრიდან დოკუმენტზე ხელმოწერა, პოლიტიკურ ვაჟკაცურ ნაბიჯად შეიძლება ჩაითვალოს იმისთვის, რომ ქვეყანაში კრიზისი, რომელიც ხელოვნურად შეიქმნა, საბოლოოდ დარეგულირდეს. ამიტომ ვინც ხელს მოაწერს მისასალმებელია.
ის ხალხი, ვინც დოკუმენტს ხელს არ მოაწერს იმ პოზიციაზე დარჩება, რაც მხოლოდ სააკაშვილისთვისაა მისაღები, ამით ისინი ისევ უფსკრულისაკენ მიექანებიან და მათ მომავალი არ გააჩნიათ.
საზოგადოება ხედავს, თუ რა ძალასთან გვაქვს საქმე, რომელიც არის რადიკალური ფრთა. მათ ნორმალური პოლიტიკური ცხოვრება არ აწყობთ, მათთვის მისაღებია მხოლოდ რევოლუციური სცენარი და რადიკალიზმი“, – განაცხადა ლევან ნიკოლეიშვილმა.
მისი თქმით, მხარეებს შორის შეთანხმება არის იმის საფუძველი, რომ ქვეყანაში მოვლენები ნორმალურად და სტაბილურად განვითარდეს, რაც ჩვენთვის აუცილებელია.
„ქვეყანას გააჩნია უამრავი გამოწვევა. აქედან გამომდინარე საზოგადოებაც დაიღალა პოლიტიკური იწილო-ბიწილოთი, რომლისთვისაც დღის მთავარი თემაა, რამდენიმე ადამიანი შევა თუ არა პარლამენტში. ერთი მთავარი რამ უნდა გვახსოვდეს, რომ ეს ქვეყანა არ ეკუთვნის ცალკეულ პარტიას, ეს ქვეყანა ყველასია“, – განაცხადა ლევან ნიკოლეიშვილმა.