სპორტის სასახლის მიმდებარე ტერიტორიაზე, ე.წ. ბარაკების ადგილზე დაახლოებით, 1 300 კვ.მ სკვერი მოეწყო, – ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.
კალაძემ კიდევ ერთხელ აღნიშნა, რომ მათთვის მთავარი ახალი რეკრეაციული სივრცეების მოწყობაა.
„თქვენ კარგად მოგეხსენებათ სპორტის სასახლის მიმდებარე ტერიტორია საცხოვრებელი კორპუსებით თუ როგორი დატვირთულია. ეს ადგილია ნათელი მაგალითი, თუ როგორ არ შეიძლება კონკრეტული სივრცეების ურბანულად განვითარება. სამწუხაროდ, დღეს ასეთი პრობლემა გვაქვს. აღნიშნულ ტერიტორიაზე ბარაკების ნაცვლად კორპუსის მშენებლობა იყო გათვალისწინებული, თუმცა ადგილობრივ მოსახლეობასთან გვქონდა მოლაპარაკებები და ამ ბარაკების ადგილზე გავაკეთეთ ძალიან კარგი დასასვენებელი სკვერი“, – განაცხადა კალაძემ.
მისი თქმით, სკვერის ფართობი დაახლოებით, 1 300 კვ.მ-ია.
კალაძემ სხდომაზე წარმოადგინა ფოტოები, თუ როგორ გამოიყურებოდა აღნიშნული ტერიტორია სკვერის მოწყობამდე. მერმა მადლობა გადაუხადა საბურთალოს რაიონის გამგეობასა და გამგებელს გიზო ვასაძეს გაწეული სამუშოებისთვის.