ავიაკომპანია Wizz Air დღეს საქართველოს საავიაციო ბაზრის ერთ-ერთი უმნიშვნელოვანესი მოთამაშეა და ამ შედეგში ქუთაისის ბაზას თავისი განსაკუთრებული წვლილი შეაქვს, – განაცხადა საქართველოს აეროპორტების გაერთიანების გენერალურმა დირექტორმა, ლევან მოსეშვილმა ქუთაისის საერთაშორისო აეროპორტის 14 წლის დაბადებისა და Wizz Air-ის ბაზის 10 წლის იუბილესადმი მიძღვნილ საზეიმო ღონისძიებაზე.
„ქუთაისის საერთაშორისო აეროპორტი არის კარიბჭე, რომელიც იმერეთს მსოფლიოსთან აკავშირებს და რეგიონის ეკონომიკურ და ტურისტულ განვითარებაში მნიშვნელოვან როლს ასრულებს და სწორედ ამ განვითარების ისტორიაში განსაკუთრებული ადგილი უჭირავს ჩვენს სტრატეგიულ პარტნიორს, Wizz Air-ს“, – განაცხადა ლევან მოსეშვილმა.
მისი თქმით, ზუსტად 14 წლის წინ Wizz Air-მა ქუთაისის აეროპორტიდან პირველი რეისი შეასრულა, ოთხი წლის შემდეგ კი, 2016 წელს, ქუთაისში ავიაკომპანიის ბაზა გაიხსნა.
„ეს უკვე მხოლოდ ახალი ავიამიმართულებების დამატება აღარ იყო. ეს იყო განვითარების ახალი ეტაპი როგორც აეროპორტისთვის, ისე მთლიანად რეგიონისთვის. ბაზის გახსნამ ქუთაისში ავიაკომპანიის მუდმივი ოპერირების ახალი შესაძლებლობა შექმნა, რასაც თან მოჰყვა ახალი მიმართულებები, ფრენების სიხშირის ზრდა და დამატებითი სამუშაო ადგილების შესაძლებლობები.
ერთი ბაზირებული საჰაერო ხომალდით დაწყებული ისტორია დღეს უკვე ოთხ ბაზირებულ საჰაერო ხომალდამდე მოვიდა. ამ ათი წლის განმავლობაში Wizz Air-ის ბაზა ქუთაისის აეროპორტის ზრდის ერთ-ერთ მნიშვნელოვან საყრდენად იქცა. ამ თანამშრომლობის შედეგი მხოლოდ მგზავრთა რაოდენობასა და მიმართულებების ზრდაში არ ჩანს. ეს არის ადამიანებიც, რომლებმაც ავიაციის სექტორში მუშაობის შესაძლებლობა მიიღეს, ახალი პროფესიული გამოცდილება შეიძინეს და ამ ინდუსტრიის განვითარებაში საკუთარი წვლილი შეიტანეს.
ამიტომ, Wizz Air-ის ბაზის 10 წლის იუბილე ჩვენთვის მხოლოდ ავიაკომპანიისთვის მნიშვნელოვანი თარიღი არ არის. ეს არის ქუთაისის აეროპორტის განვითარების ისტორიის მნიშვნელოვანი ნაწილი. და ამ პარტნიორობის მასშტაბს კიდევ ერთი ფაქტი აჩვენებს“, – განაცხადა ლევან მოსეშვილმა.
საქართველოს აეროპორტების გაერთიანების ხელმძღვანელის თქმით, Wizz Air ბოლო წლების განმავლობაში საქართველოს საავიაციო ბაზარზე მგზავრთა რაოდენობის მიხედვით ლიდერ პოზიციას ინარჩუნებს.