სუფრაზე წარმოქმნილი კონფლიქტი, რომელიც შემდეგ ფიზიკურ დაპირისპირებაში გადაიზარდა, წელიწად-ნახევრიანი სარეაბილიტაციო კურსით გაგრძელდა – ცოტნე გამსახურდია სამშობლოში გუშინ დაბრუნდა.
მეუღლის, ანა ჯაბაურის თქმით, ზუსტად წელიწად-ნახევარია საქართველოში არ ყოფილან. 6 თვე-ნახევარი თურქეთში, ხოლო 11 თვე-ნახევარი გერმანიაში დაჰყვეს. საქართველოში ჩამოსულები კოლხურ კოშკში დაბრუნებას ვერ ახერხებენ, რადგან როგორც ცნობილია, რძალ-დედამთილს კონფლიქტური ურთიერთობა აქვს.
„ემოციები დადებითია, თან ვფორიაქობთ. ამდენი ხანია აქ არ ვყოფილვართ, ძალიან გვიხარია. ექიმებმა რომ გვითხრეს წამოგვეყვანა, ჩათვალეს, რომ მის სიცოცხლეს საფრთხე არ ემუქრება. ამბობენ, რომ თავის გარემოში, საკუთარ სახლში უნდა იყოს, რადგან გაახსენდეს რაც უყვარს. სამწუხარო მიზეზის გამო, ცოტნეს დაბრუნება კოლხურ კოშკში ვერ მოხდა. ჩემს ბინაში ვართ, მეცხრე სართულზე, სადაც პანდუსები არ არის და ვერც გაკეთდება. სამწუხაროდ, ჯერჯერობით, სახლში უნდა მყავდეს. ყველა სპეციალისტი, რომელიც ცოტნეს სჭირდება, ჩვენთან მოდის“, – ამბობს „პრაიმტაიმთან“ ანა ჯაბაური.
ცოტნე გამსახურდიას ჯანმრთელობის მდგომარეობა რეაბილიტაციის დაწყებიდან 1 წლის შემდეგ ისევ გაუარესდა, თუმცა, უცხოელი სპეციალისტები ოჯახს აიმედებენ. ამ მხრივ, პროგრესიც თვალსაჩინოა.
„ცოტნე მარტში იმდენად კარგად იყო, რომ 10 აპრილს თბილისში დაბრუნება გვქონდა გადაწყვეტილი. მარტის ბოლოს ტრამვის დაგვიანებული შედეგი მივიღეთ. ისეთი გართულება დაემართა, რომელიც ასეთ პაციენტებში პირველი 5 წლის განმავლობაში 80%-ში გვხვდება. წელიწადზე მეტი იყო გასული, ყველა ოპტიმისტურად ვიყავით განწყობილები, ამას არ ველოდით. მისმა რეაბილიტაციის პროცესმა ამის გამო უკან დაიხია.
ჯერჯერობით, ცოტნემ ლაპარაკიც შეწყვიტა. როგორც პროფესორები მპირდებიან, ყველაფერი ისევ იმ წერტილს დაუბრუნდება, რაც მარტში იყო. მას მშვიდი, არასტრესული გარემო სჭირდება. აუცილებელია ვარჯიშები. მთავარია, რეაბილიტაციის პროცესი სწორად წარიმართოს.
ახლა მდგომარეობა მკვეთრად გაუმჯობესებულია – აქამდე ნახევრად მძინარე იყო, უკვე გონებაზეა, რეაქციები და მიმიკები აქვს. კიდურების მოძრაობა დაიწყო, თუმცა, ლაპარაკი არ დაუწყია. არავერბალური კონტაქტი ისევ გვაქვს. იგივე გზას მეორედ გავდივართ, მაგრამ ახლა უფრო სწრაფად“, – ამბობს ჯაბაური.
2019 წლის 19 დეკემბერს პირველი პრეზიდენტის შვილი ვერაზე, საკუთარ სახლთან დაჭრეს.
„დაზიანებულია გულმკერდის მარცხენა ნახევარი, ამ მიდამოში აღენიშნება ნაჩხვლეტ-ნაკვეთი ჭრილობები, გულ-მკერდის ღრუში შემავალი ჭრილობები, მარცხენა ფილტვის ზედა წილის დაზიანებით და ე.წ. ჰემოპნევმოთორაქსი, ანუ პლევრის ღრუში სისხლის და ჰაერის არსებობით. გარდა ამისა, მარცხენა ბეჭის მიდამოში აღენიშნება ნაკვეთ-ნაჩხვლეტი ჭრილობა ბეჭის ე.წ. აკრომიონის დაზიანებით და თავის მიდამოში, თხემის მიდამოში ოთხი ჭრილობა ნაკვეთი და დაჟეჟილი ჭრილობები“, – ეს იყო ის დაზიანებები, რომლის გამოც გამსახურდიას ჯანმრთელობის მდგომარეობა დამძიმდა და მისი საზღვარგარეთ გადაყვანა გახდა საჭირო.
წყარო: „პრაიმტაიმი“